近年備受黎明力捧嘅孖生姊妹衞蘭同衞詩，最近猛俾人翻舊情史。日前本報收到兩張兩姊妹嘅舊相，一張係同一名貌似張達明嘅男仔合照，另一張就同一大班朋友聚會，嗰名貌似張達明嘅男仔都喺度，仲要從後攬住衞詩，可見佢哋關係幾咁親密。
雖然衞詩前晚話同對方只係朋友，而且對方嘅女友係家姐衞蘭幫佢追番嚟。不過本報噚日又再收到兩姊妹同嗰個男子嘅相，今次仲加多一個男仔，兩pair男女一齊食兩姊妹嘅家鄉菜──韓國菜，但就輪到衞蘭用手搭住「翻版張達明」嘅膊頭，態度非常親暱。
關楚耀力撐
衞詩同緋聞男友關楚耀噚日喺九龍灣出席活動，講開同「翻版張達明」嘅親熱照，衞詩話：「個男仔唔係我男朋友，只係好朋友，冇聯絡好耐。我係鬼妹仔性格，同人咁影相好平常。」關楚耀就話未睇過啲相，但佢話：「其實喺外國攬吓，輕吻面部好平常，唔係乜嘢大件事。」雖然衞蘭兩姊妹話同呢名男仔只係普通朋友，但佢哋食飯食到咁親熱，馮仁昭對呢種鬼妹仔作風都有所保留。
