上個禮拜叫大家避一避德甲「黑盤王」漢堡，果然呢隊波好似醒晒咁，主場以3:1擊敗法蘭克福，讓半/一都食晒成個盤；如果漢堡繼續呢股氣勢，季尾變番「紅盤王」都得，所以大家暫時都唔好同漢堡作對。
人有三衰六旺，球隊都係；睇「黑盤王」走勢，有5支球隊輸盤率下降，小弟推介嘅荷華高斯對家，亦都未能命中，真係唔好意思；今日就醒番場過大家，希望連本帶利贏番佢。
蘇超「黑盤王」格拉斯哥流浪上周輸盤率不變，只不過係佢哋冇波打啫。流浪今周作客喜伯年，以海外莊家開盤，流浪讓到半球，認真辣；講真，喜伯年賣走咗主力中場奇雲湯臣去流浪，實力係有削弱，但話哂今季主場聯賽都12場不敗啦！些路廸今季作客嚟到，都攞唔到3分走。
以流浪目前聯賽位置，追榜首嘅些路廸真係妄想，保住來季歐聯外圍賽嘅第2位又相當穩陣；而且下周中就要打歐協盃16強首回合，主場對奧沙辛拿，都算係硬仗；今場聯賽留力都唔奇，「讓球主客和」捧「主勝」，喜伯年不敗就收錢，要得過。 文：牽牛