舊年經濟好景，打工仔都寄望今年加多啲人工，雖然政府剛公布嘅財政預算案提到，預期今年反映通脹嘅綜合消費物價指數係1.5%，比舊年2%低，老闆大條道理可以加少啲人工畀夥計，但聽講本地龍頭發展商之一嘅新地，最近公布加薪幅度，平均加3.5%，最高加到7%，恨死好多人。截至去年6月底，新地員工有2.5萬人。
新地員工之所以有人工加，華華覺得，佢哋旗下喺觀塘個商場apm都應該進貢唔少，因為佢哋舊年搞咗大小活動達510個，計落每日1.4個，新地代理租務總經理馮秀炎話，𠵱家啲客仔對商場要求越嚟越高，所以宣傳活動要做到足，估計今年活動會多達800個，即平均每日2.2個，宣傳費亦會比舊年增加一至兩成，去到5400萬以上。
畀咁多錢做宣傳活動，最緊要梗係旺丁又旺財。馮秀炎估計，揼咗最多錢宣傳嘅2月農曆新年，總人流會有886萬，比舊年升15%；而營業額就有3.3億，多18%。