地鐵車廂內嚴禁飲食，當朝早遲到唔夠時間食早餐，兼且要逼地鐵趕返工返學的時候，好多人心裏面都會浮起一句說話：「地鐵可以開餐就好喇！」因為一次矇查查在地鐵食嘢時被歧視的瘀事，引發了3位年輕人開設一間以地鐵車廂為題的茶餐廳，誓要一雪前恥咁話：「邊個話地鐵車廂唔食得嘢?！」
記者：林思樂
攝影：何家亮
Model：Tanya
概念來自瘀事
店內的白色牆身、長方形大玻璃窗、吊環扶手及磨砂金屬長椅等，完全似足地鐵車廂，點解當初會有呢個構思呢？皆因「爆炸思想」的3位老闆都是有雄心壯志的年輕人，老闆之一阿智話：「希望日後餐廳分店開到好似地鐵站咁多！」這想法令老闆之一謝生聯想起10幾年前的瘀事：「當年我剛剛來港定居，唔知地鐵不准飲食，朝早搭地鐵返工時在車廂內食三文治充飢，點知俾好多人用奇怪目光望住，連續好多日都係咁，後來問人先知原來地鐵車廂唔可以食嘢，真係好瘀！」因此3位年輕人就決定推出全港首個准許乘客飲食的「地鐵車廂」。
車廂解構
多種香草醃製食物更惹味
爆炸思想除了裝修有心思，食物方面亦有誠意，另一位老闆阿Ken有多年酒店西餐廳的入廚經驗，對食物要求非常高，堅持用天然的新鮮材料，蔬果、肉類、海鮮等材料日日從街市新鮮入貨。阿Ken又會在傳統烹調方法上加入創意，創作出多款美味菜式。
爆炸俄羅斯式芝士焗雞扒$58
自創以Pizza製法煮雞扒，雞扒上鋪滿青椒、洋葱、紅椒、番茄、酸忌廉等，加入俄羅斯風味甜酸醬和Pizza常用的Mozzarella芝士焗製，食落似足Pizza般材料豐富，芝士與雞扒肉汁溶在一起，加上雞扒肉厚兼嫩滑，絕對是出色之作！
（前）爆炸雞翼沙律$20
（後）想不起來加$7
雞翼一點都不行貨，用上百里香等5種香草、肉桂粉及加仁里等10種香料醃製，香辣惹味，再加上清新配菜士多啤梨汁配火龍果，全不覺油膩。加$7就可以歎埋杯招牌特飲「想不起來」，飲用前要先攪勻，內裏結合3種秘密特製果味到現在都未有客人估得出用甚麼材料炮製！
想不起來肉燥飯$27
老闆另一家餐廳「想不起來」的熱賣招牌菜，重點在於每日使用新鮮豬肉，所以肉味零舍香濃，並以特製香料秘方燜足2小時，非常入味，肉碎豐富醬汁多，撈飯一流！
無國界燒羊扒$72
用高溫炭燒新西蘭羊扒，完全鎖住肉汁，三件羊扒分別用藍莓薄荷汁、大量新鮮番茄自製的鮮茄醬及意大利羅勒香草醬炮製而成，集合多國滋味。
拉丁風味海鮮燴扁麵$42
用蜆肉、青口、魷魚等多種海鮮，材料豐富，兼且日日在街市新鮮入貨，鮮味十足，加上自家製香草番茄醬燴扁麵，清新爽滑。
讚：裝修設計的Idea好爆，食物好味有創意，唔係虛有其表靠噱頭。
彈：可能剛剛新開張，店員未熟手，客人多的時候出菜較慢。
睇路搵食
爆炸思想（24022275）
地址：荃灣大壩街63號地下
座位：約40個
交通：荃灣地鐵站A出口，在南豐中心對面乘搭綠色小巴301、301M或九巴30X至大涌道寶安商會王少清中學落車。