對住唔同人講唔同嘢，從噚日財經事務及庫務局局長馬時亨好似一隻馬仔咁，響兩個鐘頭內跑足六場新春酒會，居然畀佢度出六款祝賀講詞而唔覺重複，有啲仲幾好笑，真係服咗佢。
馬仔響證券經紀業協會酒會話，踏入豬年後個市非常波動，尤其過去幾日，各位（證券公司老闆或高層）見過晒73至74年、87年股災，及近幾年個市大幅波動，應該可以畀到客戶專業嘅忠告，話佢哋聽𠵱家係入市執平貨抑或係最後離場嘅一刻！
而喺上市公司商會嘅酒會，馬仔就話，港股市值已由第八位升上第六位，各位（上市公司主席或董事）出埠做路演時，應該可以好光榮咁話畀人知，佢哋係嚟自全球第六大證券市場。馬仔仲話自己冇響會計師公會酒會講錯嘢，但就話搞唔清究竟方俠（港交所董事）、方正（證監會主席）同方中（會計師公會會長），邊個係大邊個係細，事關個個都咁後生，𠱁得方正鬼咁開心，回應話叫得呀俠就梗係大佬──你估馬仔唔知咩。