噚日新正頭十二係吉日，宜開市及會友，所以好多酒會撞埋一齊，喺正下晝5至7嘅吉時，係巧合定係搵過高人算過就不得而知嘞。
除咗經紀業界，中銀香港亦有新春酒會，佢哋嘅合作夥伴都出席拜年，短短兩個鐘的酒會熱鬧非常，唔少重量級政經界人物及「大孖沙」都畀足面嚟。仲有金管局任總、李超人同大仔鉅鉅、呂志和、郭炳江、范鴻齡、黃志祥等，彤叔鄭裕彤周圍同人拜年，連平時鬥個過你死我活嘅滙豐大班鄭海泉亦有到場打個招呼。
酒會一開場，搵嚟十二個唱得嘅員工，唱吓串燒賀年歌，足足10分鐘長兼有晒台風，搞旺個場，希望帶旺今年中銀嘅生意。