一般足智彩項目，例如「主客和」、「讓球主客和」及「讓球」，回報機會同賠率成正比，一般都只得1.5至3倍分頭。雖然有啲冷門可以出現幾十倍賠率，但真係開得出嘅有幾多？所以，賠率相對較可觀嘅「波膽」及「首名入球」，係比較吸引欲以小博大嘅波友，亦可謂最能夠同一般賽馬項目保持競爭性嘅。今次就講下身邊友人，點玩「首名入球」。
熱門射手上名率下跌
鍾意捧熱門嗰班，最近猛同華度呻，話𠵱家無咗從前嗰支捧幾個熱門球員過關、經常收錢嘅歌仔唱！睇番呢幾個禮拜，比較多波打嘅周末場合，的確唔見有編號「101」及「201」嘅對賽兩軍中，熱門球員開出「首名入球」嘅情況。
事實上，環顧當今歐洲勁旅，今季仍然能夠保持到穩定「首名入球」上名率嘅射手，只有車路士杜奧巴。亨利、舒夫真高、雲尼斯達萊、伊度奧呢4位堪稱近年喺呢個項目，上名率最高嘅射手，今季都分別因傷而長期缺陣、唔適應新環境、或者狀態不復從前，走勢齊齊出現大幅下跌情況。
反而季前被睇成2線嘅球隊，例如西維爾及史特加，就彈出咗簡路廸及馬里奧高美斯，暫時亦以呢兩位鋒將，最得呢班喜捧熱門嘅老友歡心。可惜，西維爾及史特加話明係2線隊，直播場合永唔及得上1線勁旅，搵錢機會又少咗噃！文︰華度