如何看2012雙普選？
梁家傑：千祈唔好當北京抗拒民主，民主同法治直情係國策，北京喺香港行嘅全部都係務實理性；大家都記得，曾先生曾經俾人講過形容過係港英餘孽，北京都敢起用，證明係理性，係務實啦；只要三方支持，2012普選都係務實。
曾蔭權：香港人好務實，好清楚邊啲係堆砌嘅謊言、邊啲係無法實現嘅口號，最重要係我哋有計劃點樣爭取普選，我嘅計劃係唔好再多講，唔使等到08年就可以喺今年啓動機器。
如何從教改錯誤中有所改善？
梁家傑：𠵱家最大問題係主事官員覺得自己諗嗰套啱晒，對於嗰啲前線教育工作者完全嗤之以鼻，覺得我諗嗰啲無得錯，你哋行埋一邊，你最好都係唔好講嘞。
曾蔭權：我只係想對所有投身教育工作者，不論做政策嘅，做老師嘅，每個人都要公道一啲。
如何確保基建工程上馬？
梁家傑：呢句說話證明曾先生都幾脫節，而且無反省能力，立法會唔係專登同你過唔去，係你向單一大財團進行單一傾斜吖嘛。政府應該反省一吓，唔好吓吓話人阻住你。如果俾市民參與規劃，肯定好多工程都可以上馬。
曾蔭權：我要維持每一年投放290億喺工程方面，會跟住呢個方向盡快喺五年內落實；呢啲工程（沙中線等）會跟住上馬，我只希望梁先生嘅公民黨，唔好阻住呢啲工程就可以嘞。
闡述治港理念
梁家傑：有競爭先有進步；香港係需要變，好似一間大公司咁，如果要變，首先要換邊個？就係行政總裁。
曾蔭權：呢個辯論畀我嘅感覺係Alan樣樣都話要改法例請律師，做各方面法律修改工作，搞到香港就好似律師治港咁。
擔任特首資格
梁家傑：曾先生喺呢18個月內做咗啲乜嘢政績出嚟呢？（政改）五號報告書過唔到，西九（計劃）整裝再上馬，做到嘅可能係天星鐘樓，果斷一日之內將佢拆咗送咗去堆填區，仲要碎埋。
曾蔭權：我哋提交咗過300條附屬條例，另外又有700宗新財政計劃落實咗，幫咗香港人；我哋其實係做咗好多工夫，最重要唔好成日掛住人哋做唔到啲乜嘢。