年初七人日，請幾位長輩長者到沙田馬會凱旋廳飲茶，坐低冇幾耐，見到預科學生Y低頭刨書，問佢：「睇漫畫呀？」答案出乎意料之外：「讀緊《記憶像鐵軌一樣長》呀！余光中真好嘢，寫一個電話都可以用幾頁紙。」點解理科生會突然「文藝」呢？學生Y話：「先生要做project吖嘛！」左丁山順手搶過本書嚟睇吓，揭到余光中寫飛鵝山與沙田七友（中文大學嘅文人雅士如宋淇、喬志高、陳之藩、思果等等……）不讀猶可，一讀入晒神，余光中文筆實在太吸引，讀到唔知隔籬講緊乜。
忽然間有人行埋嚟講「恭喜發財」，「恭喜你輸得漂亮」，抬頭一望，原來係大班鄭與鄭太同朋友嚟凱旋廳飲茶，走埋嚟打招呼。點解講「恭喜輸得漂亮」呢，因為梁家傑競選辦公室嘅媒體顧問「老師陳」亦喺度也。老師陳一味識得笑，與大班鄭面對面，邊度夠佢講呀？左丁山就恭喜大班鄭︰「贏得轟轟烈烈！」何謂轟烈呢，只要梁家傑喺三月二十五號得選委票少過提名票，曾蔭權得票超過六百四十，就算係嘞。
大班鄭畀好多人話係煲呔針，煲呔以高票連任嘅話，大班鄭一定名列功勞榜。新年收到唔少賀年短訊，松哥話：「祝你和家人春節愉快，豬年順景安泰。」肥仔豪話：「祝你金豬年，榮利兩兼得，華嘩聲行運，富善多積福，貴人送大吉」，橫讀四字就係「榮華富貴」，幾有心思；大班鄭就話：「豬肥家業旺，春好福源長，人開致富路，豬拱發財門。」
睇完大班賀詞，靈感突至，學人寫短訊，回覆大班，搞咗成四十五分鐘先至送得出：「恭喜發財，不止做好一份工，更要有份好筍工，筍工唔係人人有，好工人人都會湧。」話到尾，打工仔望發達，未免想頭過高，但希望搵到份好筍工，唔算過份吖，靠湧湧到一份嘅話，打工仔一定會做好嗰份工啦。曾競選辦嘅宣傳攻勢十分凌厲，「我會做好呢份工」呢句口號，周圍都見到。銅鑼灣近隧道有幅牆就有呢句標語，十分搶眼。梁家傑陣營大概五行欠水，否則嘅話，「還票於民，2012雙普選」，呢句口號貼通街，都可以對抗吓﹗