話《死亡筆記》係近年最有影響力嘅動漫之一，肯定唔會有人反對，事關唔止連載嗰陣好多人追看，甚至兩部真人版電影都票房勁好，帶起一輪鬥智熱潮。由於NDS帶起狂玩智力遊戲熱潮，因此就借呢套作品嘅名氣推出咗互相鬥殺嘅新Game，任你扮夜神月或者L，總之唔想輸就要靠把口𠱁掂其他人，實行玩盡大家信任，一係拉到真兇一係逍遙法外！
文：陳福榮
呃𠱁似玩KillerGame
呢隻《死亡筆記KiraGame》並唔係拎住本筆記，召個死神出嚟周圍殺人咁簡單，而係警方為咗增強調查人員思考及推理能力而特別設計嘅遊戲，要成班有關人士單憑證供疑點捉個「兇手」出嚟。玩家可以選擇飾演做L（調查者）或者夜神月（被查者），做L就當然係千方百計咁去令大家信服自己觀點，至於做阿月則要花言巧語洗脫自己嫌疑，唔好俾人知道自己啲衰嘢之餘更要屈無辜者做代罪羔羊。由於玩法主要係玩弄各人情緒喺股掌之中，而且做L嗰陣兇手唔一定係阿月，任何一個人都有嫌疑，玩起嚟真係勁似大家學生時代接觸嘅KillerGame㗎！
重現漫畫著名場面
喺調查部份，玩家要憑個人三寸不爛之舌，抽秤其他人嘅證供以收取捉拿真兇或者幫自己洗脫嫌疑之效，所以登場人物全部都係來自漫畫原作，例如美少女偶像彌海砂同埋幾個刑警等，如果唔係又點會夠人充撐場面。縱使隻Game玩法咁獨特，其實都有依照漫畫劇情發展嘅故事模式，因此唔單止配角們會逐一出場，喺第二部承襲咗L地位嘅尼亞同米洛，更係本作品嘅隱藏人物，想用到佢兩個就要喺故事模式不斷搵啲神秘蘋果出嚟，儲夠10個就可以用晒佢哋喇。
機種：NDS
廠商：Konami
類型：ETC
人數：1-2人
價格：$290
懷舊風格靚動畫
喺《死亡筆記》推出嘅同期，Level5呢間九州新興勢力炮製咗名為《雷度教授與不思議之町》嘅查案遊戲，但佢唔係單純咁去搵線索捉拿犯人咁簡單，而係借助大量食腦IQ題嚟考吓大家。即使係香港人玩上手都會覺得過癮兼特別。為咗令佢嘅偵探Feel更為突出，開發人員仲專登將畫風調節到好有舊時嘅霧都色彩，仲搵咗當時得令美少女演員堀北真希嚟配音，相信單係呢個賣點已經吸引到唔少麻甩仔畀錢入貨啦。值得一提嘅係，佢嗰條開場動畫絕對唔嘢少，咪以為Cap兩格俾大家睇就覺得佢冇料到，查實佢嘅質素仲勁過SquareEnix嗰啲CG，格數夠多流暢到痹，似足睇卡通咁款，一啲都唔嘢少。
考智慧IQ題
由於開發商係曾經炮製過《DragonQuest8》同埋《DarkChronicle》嘅Level5，兼且呢個作品係佢首次以出版商名義進軍遊戲界，因此內容絕對唔敢馬虎，而事實上睇返唔少人意見，佢啲智力題目都幾啜核，唔識日文隨時可能解唔到，因此有需要嘅話不妨搵啲攻略參考吓。講返啲IQ題，廠方邀請咗喺日本好有名氣嘅智力大師擔任總監，專門設計啲容易理解得嚟幾考腦筋嘅題目，由郁火柴、一筆畫、玩數字甚至係找不同嘅形式都有，假如憑個人理解力洞悉到箇中玄機，嗰種滿足感真係大過RPG打贏勁怪㗎！因此佢將查案同智力題目糅合埋一齊，一次過滿足兩個願望，想唔襟玩都幾難。
機種：NDS
廠商：Level5
類型：AVG
人數：1人
價格：$290
