3月1日，會展中心……
「曾先生，請問你，對於有96萬名香港女士從未結婚，而當中又絕大部份是高學歷的專業人士。未知你有否任何人口政策，可以改善這嚴重的男女失衡情況？唔該。」
嘩，咁毒，問條咁嘅問題。係人都知𠵱家啲衰男人，個個北上，唱卡拉OK，飲酒跳舞，尋歡作樂。祖國地大物博，班麻甩佬happy到樂而忘返，有甚麼法子唔男女失衡？但大庭廣眾，七百幾個選委，仲分分鐘有幾百位是常客。你咁迫我，惟有敷衍你。
「人口政策問題，結構複雜，並非三言兩語可以解決。不過，我們一向信奉大市場，小政府。男女婚姻都是市場之一，政府又難以粗暴干預。」
「曾先生，人道政制發展是你死穴，我想請問你，究竟是否代表你永遠都要用策發會去做擋箭牌，還是心中有數，有本事可以搞一個共識方案？」
又問？悶死人。問呢條問題，你一定係泛民爪牙。我都想早日搞掂，等我可以千秋萬世。不過要擺平你哋，又要擺平大富豪，談何容易？少啲政治手腕都會焦頭爛額。數勻全香港，可以有本事做到面面俱圓，捨我其誰？你以為用呢條所謂死穴問題，就可以難倒我？
「最重要，是有可行方案，而並非單憑口號。我毋須等2008年，今年年中我就會啓動機制。我承諾未來五年，一定可以在普選問題，做出成績。」
「曾先生，點解你唔容許市民進場，參與答問大會？」
早知你會咁問，其實在座全部都係市民，又使乜咁煩，再搵其他市民？你哋有百幾人，全部都會到齊。我雖然叠馬，有六百幾人，但啲大老闆又點會出來同你癲？單係對付你哋已經夠煩。仲要市民？
「我每日都接觸市民，我接觸市民時，Alan還在唸大學。最重要是繼續接觸市民。」
「曾先生……」
「主持，點解條條問題都係問我？Alan一條問題都冇？」
「曾生，冇法，你做硬特首，問你對手都嘥氣，你唔係咁都唔明？」
方卓如