新春期間各聯賽嘅「紅盤王」好多都冇料到，希望過完呢個農曆年，啲盤王可以生生性性幫大家執番多少。今期繼續推介德國波，揀選啱啱榮升德甲「紅盤王」嘅緬恩斯，作客同級球隊亞琛可以贏波贏盤。
亞琛近3場聯賽未輸過，前周仲主場砌低拜仁慕尼黑，今場肯定成聚飛球隊；但係波友有冇諗過，亞琛根本唔係打主攻嗰家波，平手盤都要唔過。何況佢哋周二先喺德國盃作客0:2負禾夫斯堡；睇番亞琛個陣，擺明想爭晉級，前面排出3箭頭伊比斯域、舒拿達夫同路斯拿，仲要全部踢足全場，今場對緬恩斯又想搶攻？有冇力先？
嗰邊緬恩斯貴為新任德甲「紅盤王」，贏盤率都叫做有56.5%，最勁嘅係佢哋喺歇冬之後仲未輸過，6場聯賽5勝1和，亞洲盤捧親都贏；加上緬恩斯喺德國盃一早出局，周中又唔使出戰，可以話有大把體力。緬恩斯𠵱家排第10，但只係多榜尾慕遜加柏6分，同排14位嘅亞琛3分；呢場咁啱遇到護級份子，緬恩斯唔搏先奇。 文：畢傑