大家對恒生指數期貨可能唔會陌生，但𠵱家連樓價都有期貨買，講嘅唔係發展商推出嘅樓花，而係真正可睇升、睇跌樓價嘅期貨。新鴻基金融及「風車」荷蘭銀行噚日宣布，剛達成亞州首宗地產衍生產品交易，簡單嚟講，就係雙方對賭香港樓市前景，風車銀行今次仲飾演樓市大好友。
地產衍生產品係一種新產品，玩法其實同一般期貨相似，一方睇升（荷銀），另一方則睇跌（新鴻基金融）。今次雙方係以香港大學港島住宅價格指數（HKU-HRPI）作為對賭指標，合約規模1億元，年底以升跌幅埋單計數；另外，買方荷銀每月要畀賣方3個月HIBOR加一定點子嘅年利率，據知目前平均利率約10厘。即係話，今年樓價升約一成，荷銀都只係打個和，升多過一成先算贏。
睇淡者另有其人
荷銀點解咁有信心，莫非收到特別消息？佢哋嘅地產衍生產品交易員PhilipLjubic只係話，香港基礎因素良好，而且好多分析都認為今年氣氛正面，所以好樂觀云云，不過佢就唔肯預測今年樓價升幅。但佢哋既然買咗睇升一成嘅期貨，即係話佢哋估計樓價至少升一成啦。
另一方面，華華都想八吓，點解新鴻基金融睇淡樓市？佢哋嘅財富管理行政總裁唐登靜雞雞同華華講，今次佢哋係幫背後客人達成單刁，只係飾演中介人角色，睇淡者另有其人，但就再唔肯多透露半點客戶資料。
地產衍生產品好似幾好玩咁，大家都只係篤手指，唔使真金白銀攞錢出嚟，睇好者唔使畀本變相可以買貨；睇淡者唔使有樓都可參與兼收息，但呢樣新玩意現時只受財雄勢大嘅投資者玩，金額規模至少上億元，小散戶仲未有得玩住。
[email protected]