意大利出現信用卡女賊！球星朗拿度、托廸、甚至奸到出汁嘅AC米蘭老闆貝盧斯科尼，都先後中招。
貝盧斯科尼秘書破案
據講，呢個女賊係個信用卡公司職員，利用職務之便，竊取客戶信用卡號碼同密碼後，隨即進行網上交易；而為免引起客戶注意，佢每次淨係碌一百、幾十歐元啫。講真，托廸買1次尿片及奶粉等，都可能唔止呢個數，又點會察覺呢？
AC米蘭前鋒朗拿度同托廸一樣咁大懵，直至女賊落網及被報紙報道後，佢先知道自己張卡原來被人盜用過。
呢位女賊就咁幾個月內碌咗2萬歐元（約20萬港元），直至前意大利總理貝盧斯科尼位女秘書，無意中發現１張未用過嘅卡，曾經碌過55歐元用來買手機增值卡，覺得唔妥報警後，至揭發呢單女賊案件。
求大俠覺得呢位女賊精就幾精，不過膽就細咗啲囉！堂堂托廸、朗拿度張卡，幾大都用來碌啲大額嘢啦！
點都好，盜用人哋張卡始終係犯法，所謂天網恢恢疏而不漏，大家千祈咪以身試法呀！