一位讀者李先生來電郵，相贈四句「我會做好呢份工」。李先生云：「我會做好呢份工，唔使你哋發噏風，強政勵治我話事，緊隨阿爺西與東。」
我會做好呢份工，成為全城流行語，顯然係標語創作之功，捉正香港人心理，無論係邊位，諗出呢句口號嘅仁兄或仁姐，肯定入世甚深，緊貼社會脈搏。當然，曾競選辦嘅龐大宣傳攻勢，無孔不入，其規模與專業性，都遠勝梁競選辦，亦係一個理由。曾辦對梁辦，如火箭炮對弓箭手，後者即使係花榮、李廣，射箭百發百中，都唔夠打嘅啫，限於人手短缺與資源微薄，梁辦實在難以抗爭。
中大最新民意調查顯示經一番選舉造勢之後，曾蔭權嘅民望上升（六成七），梁家傑民望下跌（十八），相距四十九點，簡值冇得揮，就證明曾辦嘅選舉工程厲害。不過咁樣唔代表梁家傑係一敗塗地喎，昨日講起左丁山請一班長者長輩飲茶，碰到鄭大班，其中一位長者就同鄭大班講：「有梁家傑出嚟做對手，對香港，對曾生都係一件好事，梁生明知不可為而為之，好嘢！」呢位長輩講得幾啱，若果香港每次行政長官選舉都係一人出選，自動當選，社會寂靜一片，當選者就好容易產生獨斷（唔敢話獨裁）傾向，擦鞋文化盛行，對香港嘅社會經濟發展好不利。
曾淵滄教授原來唔淨只識炒股票，原來寫政治亦好長篇大論，二月二十六日喺《大公報》發表一篇幾千字長文痛批梁家傑，睇到左丁山暈暈哋，卒之冇時間睇到完，曾教授寫股票就短小精悍，寫政論就水蛇春，誠能人也。好多炒股才俊，只識寫上車落車，專心評股，對政治局勢只作為炒股嘅制約條件，唔會花心機與時間去寫埋政治評論，更唔會加入邊一方嘅政治陣營。曾教授就唔同，學足索羅斯痛批布殊咁，一於痛批梁家傑，炒股與論政雙翼齊飛，健筆一枝，前途不愁。肥佬黎當年創辦《蘋果》，高價邀請曾教授加盟寫評論，認真眼光獨到，叻過伯樂相馬。曾蔭權有曾氏宗親義助，大事何愁不成。梁競選辦就係冇呢類幫腔呢。