永隆銀行成日被傳話要放盤，但係伍氏家族嘅第三代喺銀行越嚟越活躍，有人話，咁反而有助賣盤，始終隔一重，情意結冇咁深喎。
所謂第三代，即係𠵱家揸fit嗰班嘅後輩；聽講，永隆董事長伍步高嘅公子伍尚宗，本身係大狀出身，啱啱入咗銀行兩個月，仲係試用期，佢係高級經理，暫時未夠秤加入董事局。
另一位第三代接班人，係副董事長伍步剛嘅公子伍尚豐（圖），佢早前已經見過記者，喺銀行做咗兩年；伍氏第三代中，以佢喺銀行嘅資歷最耐，𠵱家已經係非執行董事。
不過，𠵱家嘅執行董事中，只有伍步高係永隆銀行創辦人伍宜孫嘅公子，另外兩位公子伍步昌同伍步揚，只係非執董；另外兩位執行董事伍步剛同伍步謙，其實係出自伍絜宜（伍宜孫嘅弟弟），換言之，伍步剛同伍步謙，係伍步高堂兄弟。
華華聽講，伍氏第三代喺銀行嘅參與會越嚟越多，有啲仲喺其他銀行實習緊，聽聞，第三代接班人將會陸續亮相，大家拭目以待！
[email protected]