金衛醫療噚日搞春茗，主席甘源例必南下出席兼發布第三季度業績。金衛喺香港創業板上市，不過甘主席始終學唔識廣東話，早年初來港，當時港人嘅普通話都仲係好普通，所以佢會帶筆同紙傍身，好彩識日文，因為日文漢字有唔少繁體中文，所以識寫繁體字。
成功人士都有一套獨特嘅生活習慣，噚日華華同甘主席同枱食飯，見佢冇起筷，先知道甘主席一向唔食早餐，有時午餐都唔食，只係七八點時食晚餐，仲話唔食早餐嗰日胃口都細啲。有行家就問，係咪體重隨金衛嘅市值膨脹，所以要減肥？甘主席迅速回應：咁我唔可以減肥嘞！
咁睇嚟有排肥，金衛繼北京後，喺上年攞埋廣東省嘅臍帶血庫牌照，已斥資3000萬元建臍帶血庫，今年下半年啓用，最多可儲存10萬份。甘主席話，喺北京每10個嬰兒，有一個有臍帶血儲存喺佢哋度。廣東省嘅出生率喺北京市嘅十倍，咁你話幾和味？
[email protected]