打正旗號宣傳整形美容嘅變靚D老闆蕭定一，噚日帶埋旗下藝人包括吳文忻、甄穎珊同石詠莉等，去黃大仙廟拜神祈福。
啱啱大執完嘅甄穎珊，帶住充滿自信嘅靚樣去拜神，其間好多巿民同遊客都搵佢合照同簽名。新面孔新氣象，甄穎珊入廟後即刻為自己新一年嘅姻緣同事業運求籤，雖然愛情求得中籤，但係佢話反而希望事業好啲，因為啱啱起步，想專心工作。
否認遭志偉輕薄
話雖如此，改胸換面之後，甄穎珊都承認確係多咗追求者，睇嚟佢想專心做嘢都幾難，不過甄穎珊就話佢請晒所有追求者食檸檬喎。對於被指大執之後個樣似蔡少芬，佢就話：「我都好欣賞蔡少芬，而且佢係絕色靚女，似佢都唔錯。」
吳文忻噚日都有求姻緣，不過佢就懶秘密咁話唔講感情事。對於有雜誌話佢早前喺拉斯維加斯一個新春派對上同曾志偉好親密，文忻就話當時志偉只係向佢畀吓工作意見，仲話本雜誌寫到志偉好似鹹豬手咁、戥佢唔抵㖭！
