俾老死拉入大埔，話食意×法特色菜，起初冇乜期望！誰知一點菜，雲吞用鵝肝包、千層麵用天使麵酥炸，就連甜品火燄山啲火燄未落到雪山已經「噓噓」聲；樓面清一色白，侍應着上歐洲宮廷侍女服，嗰種Grand法真係媲美星級餐廳！最後埋單先知每道菜只係幾十蚊：「𠵱家嘅大埔就好似當年嘅西貢，太和中心呢頭係當頭起食街，仲入西貢，Out喇！」
記者：朱崇德
攝影：何家亮
Model：Isabell
歐洲宮廷侍女好醒神
全白餐廳雖則令人眼前一亮！不過更搶眼嘅係一眾女侍應的服飾，好多客人將之誤認為Lolita：「其實佢哋所着嘅係歐洲宮廷侍女服，為配合餐廳食法×意菜主題嘛！」講你都可能唔信，餐廳開業近2個星期，竟然仍冇人講得出呢套制服嘅出處，人人都以為係Lolita：「其實Lolita嘅服飾設計，有部份是取材自歐洲宮廷侍女服，不過我哋又冇落『喱士』，所以絕對唔係！」
雲：入職時都知要着呢套制服，感覺好靚，好似個日本公仔咁，我哋成日都會坐埋一齊，諗吓用啲乜嘢耳環、手錶配襯可以靚啲。
Sugar：如果用10個靚嚟評分，我會畀呢套制服8個靚！我覺得欠咗個配襯頭飾，襯埋會仲靚！
播電影營造文化平台
白枱椅、白牆、白天花！望落感覺好似幾醒神，但做過食店嘅都知，易污糟、難打理！絕對係餐館剋星，大埔新開張嘅CultureShock睇嚟對自己嘅清潔衞生好有信心！
因乜叫CultureShock？老闆馬生話：「其實係社會學名詞！唔同文化放埋一齊起初會有啲唔協調，但相互影響、調和、變化，就會變成一種新產物，而呢個過程就叫CultureShock！正如我哋做嘅菜，創新！將冇可能嘅嘢放埋一齊一樣！」
唔講唔知，原來馬老闆係社福界出身，餐廳當然唔會話齋食咁簡單，講到當中聚焦點，首推舖中過100"投影機：「同好多餐廳一樣，我哋都會播電影，不過唔同之處，係我哋唔會播聲，影響大家進食嘛！所揀選嘅戲都會係一啲以肢體語言為主，又有社會意識Meaning！」美國30至40年代的《大國民》及《大都會》、黑澤明的黑白片，連南美實驗電影都播埋：「其實除咗做餐廳，我都好希望呢度可以成為一個文化平台，已經聯絡上香港一啲獨立製片人，往後會有更多香港實驗電影喺度上映！」
炸鵝肝雲吞$58
常食的意大利雲吞改以鵝肝配豬肉及牛肉作餡；豬加牛已是鮮香齊全，鵝肝添其肉汁、甘香，令肉味更出，喜歡者是鵝肝份量適中，微微吊味，唔會太油膩。
加菲羊扒$108
加菲？為食貓乎？非也！取其諧音，咖啡是也；以咖啡油作汁，好處是去羊肉羶味；入口先是咖啡的濃香味，繼而是羊肉的甜味，後感先係少少的羊肉鮮羶，好有層次變化。
意式雜菌千層叠$45
意式千層麵就食得多，以天使麵織成麵網再香炸，完全是另一回事，感覺有如中式的脆炸雀巢，但又有意粉的麵粉香；餡料是以冬菇、蘑菇、秀珍菇等鮮雜菌炒亂，配以鮮茄及茄膏，食落完全唔肥膩。
火燄雪山$58
淡忌廉及蛋白打成的雪山面好細密，以GIN及君度酒（40至50%）燃點淋面，濃濃橙酒鮮香撲鼻而來；打開雪山是朱古力、芒果、士多啤梨及呍呢拿雪糕，表面焦香、裏面冷，口感好有變化，雪糕再以鮮雜果配酸甜汁座食，唔似一般雪山咁寡口。
食神指數
食物★★★★
環境★★★★★
服務★★★★
價錢★★★★
讚：環境闊落舒服，侍應得意可愛，價錢唔貴，用料屬酒店級，真係少見有良心嘅食店。
彈：新創菜式，好味與否見仁見智，未必個個接受！
睇路搵食
CultureShock（29978828）
地址：大埔舊墟直街4-20號美新大廈地下B2舖
（太和火車站出，近太和中心）
座位：120個
營業時間：11am-11pm