《極速方程式》作者係《消防員的故事》的曾田正人，同《消》一樣，《極》喺資料搜集方面極之認真，漫畫裏面經常出現好多關於汽車的理論，而且頗深入，同《頭D》唔同，《極》裏面的理論比較實在，用語亦簡單，相比起《頭D》的抽象加感性技術講解，《極》的資料性就更強，甚至有時會有埋圖解，具汽車技術書籍Feel，假如你用心機去睇一字一句，對汽車知識增長的確大有幫助。
記者：之達
故事主角勝平太，自幼喪母，與父親相依為命。由於父親忙於工作，小學四年級生的勝平太一直過着沉悶的日子。一天，勝平太父親從將人家捨棄的小型賽車廢料砌成一架甩皮甩骨的小型賽車畀勝平太，本身已對車情有獨鍾的勝平太從此對賽車樂此不疲，長大後更向方程式賽車車手這夢想進發。
主角完美如戴志偉
《極》是描寫主角勝平太的成長故事，由細個玩小型賽車開始，到大個揸方程式賽車，每個階段的成長都描寫得幾仔細，當中滲入的友情及親情元素就更加係作者的強項。只係筆者硬係覺得《極》的主角勝平太欠缺一點人性，意思唔係話佢「無人性」，只係佢實在太熱血太完美，唔似得《頭D》嘅拓海咁，勁得嚟但儍頭儍腦，有優點有缺點，似番個正常人！不過或者完美就係勝平太吸引年輕讀者嘅原因之一，情況就好似《足球小將》嘅戴志偉咁，甩骱、斷幾條肋骨都一樣照踢，熱血到唔似地球人，但仍然得到大量地球年輕人捧場。
