46歲的已婚影帝黃秋生近年緋聞成籮，近日他與23歲靚女模JessieCheung頻頻約會，在剛過去的周日，秋生更背妻拖Jessie飛台北，在街頭十指緊扣，但被記者撞破後即撇女狂奔。事後否認有「鬼馬」的秋生，昨日直言自己講大話，又透露與妻子分開住。
黃秋生的家庭生活十分神秘，他既有髮妻吳惠貞，也育有兩名分別11歲和8歲的兒子，但他搬離家獨居，又極少談及妻兒，近期更屢與年輕女模JessieCheung密會。早前二人才被拍得在港依偎拖手睇拳賽，未料日前秋生再被拍得拖Jessie同遊台灣，顯見二人關係絕不簡單。
見記者即撇
在剛過去的周日晚，正在台北趕拍周杰倫執導新片《不能說的秘密》的秋生，和Jessie齊現身敦南誠品內的唱片部，當時男方戴cap帽、披長軍褸，淡施脂粉的Jessie則穿白長褸。二人齊揀CD，更投入得一起蹲地挑選，最後秋生買了大堆交響樂唱片，埋單約2,500元。離開後，他們即十指緊扣漫步，此時秋生發現有記者在場，慌忙撇下女方，獨自返酒店。
昨日記者致電Jessie，問她知否被拍得與秋生的台灣拖手照？她說：「唔知喎。」問她現在與秋生是何關係？她笑說：「唔知呀。」至於會否擔心黃太誤會及被指為第三者？Jessie一味笑說：「你問佢（秋生）啦，唔知，唔識答你。」
「我講大話㗎」
秋生昨日在電話中則說：「唔講又唔覺，又真係幾似佢（Jessie），佢係我朋友個女，我哋買完嘢出嚟見有記者，咪拖佢行快啲囉。」對於早前他和Jessie睇拳賽態度煙韌，他說：「咁又係嘅，但有嘢仲唔追落去？」問秋生和Jessie是否有「鬼馬」？他笑說：「有就好鬼馬啦，佢同好多人都熟㗎。」
秋生揚言太太沒為緋聞呷醋，他說：「點解會呀？我日日有返屋企㗎，我一路分開住，係費事被人跟到騷擾屋企人。」其後秋生提及娛圈風氣，他直言時下傳媒風氣欠佳，但記者指藝人也講大話，他竟說：「係呀，我都講大話㗎，做乜要同你哋講真話呀？」不過更神奇的是記者其後再致電Jessie，問她到底是否跟秋生遊台灣時居然口風突轉，由「唔知」變成「唔係」，問她能否出示旅遊證件？她說：「我冇passport喎。」
採訪、攝影：李全、黎寶蘋
