車仔麵周圍都有得食，話說有日落牛頭角下邨14座，發現有間文記真係幾撚手吓！豬皮、魚蛋、翼尖異常入味，以大量蒜頭、薑粒、沙嗲調配，好有老派風味，問老闆娘文太先知，原來呢度已經有26年歷史：「81年開檔，一直都係做走鬼檔，生意好！但市政捉得密，賺埋都唔夠畀罰款，所以在03年入舖，生意穩定咗，叫做有番啲微利！」
不過筆者最愛嘅，係呢度嘅清湯蘿蔔，入味得嚟又夠甜，好少地方食到，更撚手係佢個柚皮：「𠵱家唔係咁多地方食到囉！事關由浸水到上枱，前後要成4日工夫，好多舖都唔願做囉！」新派車仔麵，好多時求其煮熟個餸，淋個咖喱汁又話車仔麵，其實每樣食材都有自己應有的味道，肯下工夫嘅真係少之又少！
如果行開下邨者都知，𠵱家已經開始咗拆卸重建工程，聽講今年底前就會拆到14座，據知文記已於對面淘大側的「利基大廈」開咗新舖，如果想撐老派車仔麵檔，行過可以去食吓！
記者：朱崇德