近年健康產品賣到成行成市，連一向本業做水務嘅中國水務都插手分一杯羮，旗下持股50%嘅高原聖果首次喺香港推出沙棘果健康食品──沙棘果黃酮軟膠囊同沙棘籽油軟膠囊。
可能見記者矇查查，唔知沙棘果係乜，中國水務旗下易達興業總經理廖長天解話，早喺公元90年（即東漢年間），中國七國咁亂，愛駒都未老先衰捱到殘晒，主人惟有忍痛將啲馬仔流放，過咗一排，群馬仔竟然肥肥白白變番靚馬返嚟搵主人，主人於是跟蹤啲馬仔，查探佢哋食咗乜嘢仙丹，至發現原來係食咗沙棘果。
自此沙棘果就成為醫療同保健恩物，喺對抗衰老、降血壓同增強免疫力尤其有效。
中國水務副總經理曾松星對沙棘果業務非常有信心，估幾年後佔營業額比重會爬過水務本業頭，唔排除分拆上市。呢啲沙棘果產品下個禮拜屈臣氏有得賣，盛惠398同438蚊。
[email protected]