蘋果視窗:蓋茨成功全憑懶

蘋果視窗:蓋茨成功全憑懶

發明家愛廸生有一句名言:「天才就是99%的汗水加上1%的靈感。」在《中金博客區》內,網友懶人對此不以為然,認為勤勤懇懇的奮鬥,最終可能碌碌無為,反而世上眾多富豪名人,之所以成功並非多勞多得,而是懂得偷懶。
為免別人話佢胡說八道,懶人用以下例子印證他的「明言大義」。

懶記DOS 發明視窗大賺

全球首富比爾蓋茨是個電腦程式師,由於懶讀書,即使入到哈佛大學,冇耐就退學。他又懶得記嗰啲複雜嘅DOS指令,於是編咗個圖形的介面程式,叫視窗Windows。自此,全世界電腦都倒模一樣生堆同一副口(介)面,而他亦都晉身世界首富。
世界上最值錢品牌──可口可樂嘅老闆更懶,儘管中國茶文化歷史悠久、巴西咖啡香味濃郁,但佢實在太懶嘞,係咁意撈埋啲糖精加凍水,入樽就大賣。於是全世界有人嘅地方,大家都飲嗰啲好似血一樣嘅液體。
過氣球星朗拿度喺球場上連郁都懶,肚腩好似懷胎七月,就咁企喺對方龍門前,等個波送埋佢嗰度,先至踢一腳,呢個就係全世界身價最高嘅運動員嘞。有人話,佢帶波速度驚人,簡直係廢話,人哋一場跑90分鐘,佢就跑得嗰15秒,唔快不如送去焚化爐罷啦。
麥當勞係世界上最厲害的餐飲企業,佢老闆同樣懶得出奇,既懶得學法國大餐的精美,又懶得掌握中餐的複雜技巧。攞兩片爛鬼麵包夾塊牛肉就賣,結果全世界都可以睇到嗰個M字標誌。必勝客老闆,亦懶得將餡餅嘅餡塞入去,直接撒喺麵餅上就賣,結果大家叫PIZZA,比10張餡餅仲要貴。
有網友同意佢講,話愛廸生就係因為懶得想佢成功嘅真正原因,於是就編了開頭嗰句名言嚟誤導我哋。不過亦有網友唔同意,指名人成功之前,已落咗一番苦功,冇經歷過辛苦,何來享受偷懶。而且,以小聰明偷懶只可僥倖一時,唔可能幸運一世,君不見朗拿度發福後走樣,事業亦陷入低谷。