買豪宅投資長線贏大錢嘅個案唔少，難怪發展商嘅豪宅貨開口就係天價，吊高嚟賣。新世界嘅南區豪宅香島道33號，10座洋房喺04年推出，至今賣剩一間6號屋，發展商用過千萬將間屋裝身，喺花園整個英式大噴水池，執靚晒叫價自然唔平，意向價1.8億，每呎2.961萬蚊；間屋面積唔係樓盤中最大，但意向價同呎價最高，足證豪宅越遲賣價錢就越貴。聽美聯營業董事楊永健話，今個月初開始接受預約睇樓，噚日先招待美記參觀，並安排兩個外籍靚女影番輯相（圖），好向買家推介。
呢幢高3層嘅6號屋面積6079方呎，屋前有2389呎私家花園，樓底13呎，內有電梯直達各層，超大車房足可泊六部車。
翻查資料，香島道33號喺03年吹話賣，意向呎價只係1.6萬，但大家都已嘩嘩聲嫌貴，到04年第一間屋成交呎價已經係2.25萬（涉資1.485億）嘞，之後樓市係咁升，個盤亦越賣越貴。舊年底新世界至話6號屋呎價加到2.5萬蚊，唔夠3個月又加到近3萬蚊，足足升咗18%。
[email protected]