「老細，今次發達嘞，有條好橋sell畀你」，一位電影編劇對投資者說。
「有咩好橋快啲講，我好忙」，投資者正在日理萬機，忙着看股票價位上落。
「今次發達嘞，呢條橋就係講有條友返一份夜更看更嘅工，你估佢看咩吖嗱？佢看嘅係一間博物館」，編劇講得繪影繪聲，但投資者仍未正眼一望。
「今次發達嘞，你估呢條友看夜更嘅時候發生咩事吖嗱？就係博物館裏面嘅所有嘢居然全部變成有生命，會行會走……」
「唔？」投資者終於定一定，放下股票機，「咁博物館裏面有啲咩會行會走呀？」
「咁就睇吓老細你有咩天才提議嘞，例如可以有牛仔、紅番、非洲動物、侏羅紀恐龍……」編劇邊講邊睇老細眉頭眼額變化。
「隻恐龍唔係一隻普通恐龍，普通嘅大家經已睇到厭，所以應該係……得番一棚骨嘅暴龍！」投資者明顯已經入局。
「MarvellousIdea！就係呢隻得番棚骨嘅暴龍，加埋牛仔、紅番、非洲動物、翡翠獅子、死鬼總統，再加啲《Mummy》式嘅埃及古咒，晚晚喺博物館作反，輕輕鬆鬆鄧梓峰，九十分鐘眨吓眼就過，睇一齣戲等於睇幾齣戲，唔理好唔好睇，起碼抵睇。」編劇知道sell橋成功在望。
「咁劇情呢？有冇人情味？有冇FamilyValue？對社會有冇幫助？」
「嗰啲都唔值錢，隨口噏例如個主角最初俾個仔睇唔起，後來個仔又睇得起，博物館又可以提高小朋友對歷史嘅興趣……」
「唔好講咁多，有咁快得咁快開拍，三兩億美金內搞掂佢，Next！」投資者又攞起部股票機。
我估當日《翻生侏羅館》的sell橋情形就係咁上下，拍出嚟又的確咁上下，仲全球大收，服晒！