人人都話返大陸買樓抵，但多數係大隻講，就算娶個大陸靚老婆，寧願申請佢落嚟香港迫公屋，都唔返內地置業安居。網友番茄王同老婆就身體力行移居深圳，仲喺個人網誌《玫瑰園瑣碎事》分享兩地樓市嘅所見所聞。「香港樓價雖然表面已經比97年高峯期回落咗一半，但有去過睇樓嘅人都會心中有數，現時發展商會隨樓『附送』大量露台、窗台、工作平台（冷氣機工作嘅地方），再加上公共面積都計埋你一份；主人房擺咗大床後，已經無乜可能擺其他傢俬，想話可以兩邊落床，就真係要日日去纖體。」
實用面積君真好多
佢仲發現深港兩地發展商對「住宅面積」嘅理解好有分別：「國內樓有樣好，單位嘅面積係套內面積，唔會好似香港樓咁會送埋公共面積畀你；而且窗台面積不計，露台面積計一半。」
不過，佢話深圳樓價都開始「火」起嚟，舉例講，近地鐵站購物公園一帶嘅星河國際，每呎要1600蚊，城中雅苑就1400蚊。
除咗樓價飛升咗，香港人返大陸買樓仲要考慮，係咪可以放低香港一切，接受內地唔同嘅生活質素同文化……諗落都唔容易，始終自住唔同投資同度假。