賭王何鴻燊踏入豬年果然諸事順利，先係嚟自拉斯維加斯嘅對手金沙賭場，唔肯派74萬畀未夠秤但贏咗錢嘅16歲香港少女，搞到變為城中話題，仲俾賭王勁窒。
華華最近聽聞，賭王喺港澳直升機生意上，砌低埋拉斯維加斯之父史提芬永利。事緣賭王今年1月成功擊退永利，以超高價奪得上環信德中心頂樓直升機場18年租賃及經營權。
雖然永利搶唔到直升機場經營權，但都喺西報登晒廣告，話要請人搞直升機公司，講明要喺今年提供服務。事隔1個月，業內探子透露，永利計過條數，好似已經暫時擱置呢個計劃。
梗係啦，信德𠵱家得一個直升機坪，第2個要年半後至起好，最快08年先有得用；而賭王間港聯直升機，朝9晚11每日提供54班港澳服務，即來回每半小時一班，遲啲仲話增加周末班次。班次頻密成咁，永利插針都插唔入啦，想用到個直升機場都幾難，到時咪盞搞。
大鑼大鼓 一洗頹氣
而且，賭王為咗奪取直升機場經營權，承諾喺承租第6年起，按每名乘客向政府交800蚊「人頭稅」，較現價高9倍。羊毛出自羊身上，直升機場必然向直升機公司多收800蚊。講到底，直升機服務係賭場嘅配套，旨在方便豪客賭錢，冇錢賺，永利又點會哽呢800蚊呢。
另外，賭王間新葡京趕及豬年前開幕，所以話，賭王確實一洗頹氣，冇再俾人㩒住嚟打。聽講，賭王仲打算喺4、5月，大鑼大鼓喺中環四季酒店搞個function，公告天下攞到信德直升機場咁話。認真高興。
[email protected]