黃Sir：唉，成議員，我成日輔導人，今日真係要搵你輔導番我喇，我真係好沮喪啊！
成議員：唔係呀，黃Sir，你係社工阿頭喎，成隊社工都係你帶住服務社區，日日都唔知輔導幾多人啦，因乜嘢搞到咁唔開心啊？
黃Sir：呢次真係幫到人幫唔到自己喇！咪就係噚日財爺講嘅財政預算囉，搞到我成隊社工都好唔開心，我做阿頭就仲難頂！
成議員：吓，財政預算？聖誕唐大派糖喎，係人都有錢分，你收入都算中產，又有稅退又退差餉，淨係派一次就係冇乜誠意㗎啦，但點解會搞到你哋成班社工都沮喪啊？
黃Sir：我唔係講自己有冇着數，就算講退稅，咪即係畀番我畀多咗嘅錢，啲錢本來就係我哋嘅，都唔使多謝財爺。但真正搞到我哋成班社工唔開心嘅，係財爺話派多一個月綜援。
成議員：派綜援！你哋做社工唔係會拍晒手掌，讚政府仁慈幫弱勢社群咩？我哋做議員嘅都差啲要出嚟話成功爭取派綜援啦！喺基層啲嘅區派就實有票啦！
黃Sir：咪就係派綜援當換選票咁囉，我哋隊社工就係成年到晚叫啲綜援戶搵工，政府又成日話綜援係過渡幫助，要佢哋自力更生，𠵱家又唔係經濟低潮，失驚無神話派綜援，即係鼓勵佢哋繼續攞落去，我哋好似白做咁。我哋日日講到口水都亁，就係幫綜援戶搵工，講真綜援戶啱啱做番嘢，人工實唔高，同攞綜援差無幾，但就係有尊嚴嘛，唔使靠人哋！
成議員：又係喎，話派綜援係幫窮人，一齊分享經濟成果，咁不如全民派錢啦！
黃Sir：政府錢多，派錢畀所有市民就講得過，啲錢喺市民荷包好過畀政府亂使。好似今次派綜援咁，係就係擺明換民意支持，但就會害到綜援戶唔想再花力氣去搵工，長遠一樣害死佢哋。噚日咪有個舊個案入嚟中心鬧社工，話我哋好幫佢搵工，點知𠵱家派綜援就冇份，係都要我哋即刻幫佢申請番綜援，搞到成班社工都好唔開心，財爺當綜援係出雙糧咁，都唔知以為點叫綜援戶搵工！
《街坊Hi你》歡迎讀者及各界社會人士分享地區事務個案，本欄將盡力向有關政府部門跟進。
聯絡電郵︰[email protected]