有機化學有前途 - 左丁山

有機化學有前途 - 左丁山

新年到車公廟祈福求籤之後,成班人到沙田馬會飲茶,本以為人哋已經返晒工,凱旋廳一定大把位啦;誰知不然,全廳滿座,向隅者眾,卒之搵到一張四人枱,周圍望吓,原來有好多老細請員工食開年飯/開工飯,唔怪得啲大枱全部坐滿人,只剩番幾張四人枱,我哋夠醒目,一於化整為零,各據東西。
有咁多人喺度,自然碰到唔少中大教授。與教授W講聲恭喜發財,教授W話:「我哋邊度會發財㗎,最好你哋發財,捐多啲錢畀中大做獎學金!」教授W見親人就話大學獎學金唔夠,研究費用唔夠,唔淨止為佢自己一系,仲幫手搵埋佢嘅同屆校友捐一個全費獎學金畀新成立嘅法律學院,認真唔話得。有一啲校友唔鍾意係唔係都鬧中大,只要自己負擔得起,就捐款支持,譬如賓架W已經講過啦,此外船務C每年捐款二三十萬元辦中華道德教育研討班,地產L捐幾十萬研究香港歷史,地產W捐二百萬做獎學金(得獎學生不以學業成績為主),馬主W生前捐二三十萬獎學金,不幸英年早逝,W太答應繼續捐款……批評還批評,鬧母校大家都有自由,希望一啲校友唔係淨止識鬧而唔識得捐款,應承每個月自信用卡扣一百元捐畀母校得唔得呀?畢業咁多年,唔好話負擔唔起噃,每個月搭地鐵都唔止呢個數目啦!

教授W話歐美大藥廠紛紛到中國開發研究實驗室,求才若渴,讀有機化學嘅,人人有工做,叻仔叻女未畢業已經被聘,博士尤其搶手,新加坡猛咁搶人。左丁山矇查查咁問:「藥廠唔係要請藥劑師嘅咩?點解請有機化學學生?」教授W話:「你就好似一般學生、家長咁,有大誤會。讀藥劑學,只識配藥,跟住醫生走,唔可以有創意嘅,有機化學人才到藥廠研究新藥,有機會創製或發現新藥物,新加坡要做亞太製藥中心,啲藥廠就鍾意中國人多到中國搞R&D,故此兩方面都搶有機化學學生,讀化學系,有前途㗎!」左丁山係科學盲,分唔出什麼是無機有機,但知道化學Y到內地搞化工廠,又旺又發,十分有商機。逢係W教授推薦嘅學生,化學Y都請晒,聽講化學Y特別鍾意請香港仔,香港女喎。