每年農曆新年，華華有一個飯局就算點唔得閒都會到，就係恒豐金業（870）主席林世榮請嘅春茗，因為佢每年都有唔同嘅驚喜畀華華。佢今年就話，就算有人出到天價70億銀，買佢個純金觀音像，佢都唔會賣，因為佢哋成間公司上下日日都會拜呢個觀音，點可以賣咗精神支柱！
林世榮話，唔計之前已經賣咗嘅「純金黃大仙」同埋「黃金馬車」，𠵱家「金廁所」、「黃金12生肖」同個「金觀音」，總共重5至6噸，除咗個精神支柱同埋成名作「金廁所」外，只要個價啱，真係乜都賣得。佢仲話，重380公斤嘅「金廁所」叫價已去到3億喇！
不過，林世榮補咗句，「金廁所」始終都係佢嘅鎮店之寶，可以稱得上係佢寶號最出名嘅景點，若果真係賣咗呢個造價僅為3800萬嘅「金廁所」，恐怕會影響到展銷廳遊客流量，所以佢𠵱家仲度緊！
適逢金豬年，林世榮噚日向每位記者送咗隻「豬龍入水」豬公仔（圖片請睇B4版）！冇錯，華華冇打錯字，係「豬龍入水」，唔係大家寫開嘅「豬籠入水」。
金豬年教正字
林世榮話，係國家博物館館長同佢講嘅，喺周代嗰時寫「豬籠入水」就係用呢個龍字，而「豬龍入水」係一個吉祥擺設喎！
林主席仲話，其實大家諗真啲，若果真係「豬籠入水」，啲水係就係巴巴聲咁入落去，但係當你攞番上嚟嘅時候，啲水咪又巴巴聲咁流番出嚟！咁咪即係得個桔！真係有歷史支持，又有字面解釋，TVB可以諗吓搵佢主持「最緊要正字」！
[email protected]