哥士的（causticsoda）又名氫氧化鈉和燒鹼，屬化學原料一種，雖不是曾近榮研製出來，卻由他發揚光大。60年代，曾Sir開始教大家用哥士的通渠去迹，他跟哥士的，就似是一對夢幻組合。雖然過去有人甘詞厚幣欲以他知名度推出清潔產品，但曾Sir自問未能應付商業社會的你虞我詐而斷然拒絕。自言不奢望發達的曾Sir，寧願每日在自己小店舖打躉，繼續賣哥士的，繼續教大家通渠去迹還來得快樂、自在。 採訪：戴彩煥
81歲的曾近榮，小時候因喜歡自製模型飛機等小玩意而培養出科學興趣，以及事事尋根究柢的精神，60年代他擔任中學中文教師期間，兼任麗的（亞視前身）節目《學以致用》主持，教授家事常識，結果一做便做足15年。
曾sir說：「當年譚詠麟同我一齊出身，佢80蚊唱兩首歌，我就80蚊做一個15分鐘節目。79年我調咗去做《下午茶》，咁啱無綫有個新節目《每事問》，搵曾華倩同梁朝偉主持，叫我過檔幫手做幕後，畀啲資料佢兩個講，點知監製話佢哋講唔出嗰種趣味，做唔到令人投入嘅感覺，叫我轉做幕前，換咗佢兩個。」
不願瞓身演藝界
記者問他何不索性辭去教書工作，全身投入演藝事業時，曾Sir耍手擰頭說：「諗都唔敢諗，電視台兩下手勢就炒人，完全冇揸拿。」86年曾Sir教師工作退休後，才正式簽約無綫為合約藝員，並主演處境劇《城市故事》。不過，《城》劇結束後，曾Sir不是被投閒置散，便是安排他演出大廈看更這類閒角，令他意興闌珊而一度萌去意，但最終還是做到93年約滿才離開。
離開無綫後，曾Sir於筲箕灣天悅廣場一擲135萬買了個小舖位，開設「曾Sir專門店」，以自己做生招牌售賣家居清潔用品，每日生意額由零至數百元不等，雖然曾Sir賣的都是十元八塊的用品，但他也不厭其煩地逐一向街坊講解使用方法，服務態度頂呱呱。
改用除油浸漬粉
曾Sir講家事常識講足幾十年，如何發掘這麼多新題材？曾Sir說：「當年幾辛苦㗎，題材次次要唔同，今日講通渠，聽日講洗衫，你講番以前啲嘢，其他人會彈你，好陰功㗎！惟有自己不停揣摩，不停咪書，事事尋根究柢。」
當年曾Sir經常教人用哥士的除油去污，問何以對哥士的情有獨鍾時，曾Sir說：「當年未有咁多清潔材料，哥士的係一種可以清潔嘅材料，去油膩好叻，一洗就亁淨，但鋁窗就唔用得，會腐蝕。當年我識得一個化工原料老闆，佢好崇拜我，佢話：『點解你唔用哥士的嚟清潔？』我就係咁開始用哥士的，哥士的又平、用處又多，慢慢我咪習慣咗介紹囉！」問曾Sir今時今日是否仍然使用哥士的清潔時，他笑說：「唔用㗎啦，我𠵱家用除油浸漬粉，又稱黃粉或者去油劑，成份係乜我唔知，亦冇去研究，係嗰位化工原料老闆介紹我用，𠵱家我做電台節目，啲聽眾成日問我嘢，我都叫佢哋用呢隻除油浸漬粉，所以慢慢又成為我新嘅口頭禪！」
看淡名利工照開
除舖頭生意外，曾Sir仍有為香港電台主持《住家男人》節目，繼續解答家事常識。問何不亁脆退休安享晚年？曾Sir苦笑道：「我繼續工作係想維持自己生活上一種節奏！銀紙搵得一日得一日啦，自己又唔曉炒股炒外幣，老老實實咁，搵幾百蚊都可以維持生計嘅。有啲人話旅行歎世界，但自己又冇呢種要求，其實都好悲哀！」其實曾Sir大可利用自己名字作清潔劑品牌，在商界大展拳腳，但曾Sir又是搖頭苦笑：「好大投資㗎！以前都有人同我傾過，但全部都係想食咗你咁，我又冇經驗又冇精神去應付，我唔係追求發達嘅人，總之維持到生活，唔會瀉落嚟就算數，或者係我冇大志啦！在我嚟講，做人最緊要係心境健康！」
本欄逢周二刊出
