去到歐洲人生路不熟，唔跟團嘅朋友，拎住張地圖要自己搵車坐四圍去，就算識路周圍Look，都要畀車費。大家都知港元兌歐元滙率高企，喺歐洲真係唔係好好使，坐車隨時貴過食飯（當然食餐飯都唔平）。想慳錢又想睇勻名勝古蹟，查實可以坐當地嘅觀光巴士；意大利同羅馬嘅觀光巴士，基本上一樣係紅色開篷雙層巴士，一望就知；法國就有少少分別，分紅、黃色兩種，一樣係開篷，唔識字都唔怕上錯車。
有埋導遊介紹景點
只要見到觀光巴士車站，上車問吓售票姐姐（都幾靚女㗎！），佢就會好好招呼，先畀份好似地圖嘅指南你，裏面有晒旅客必到嘅景點及上落車站嘅指示，跟住仲會送你一對耳筒，畀你坐車時聽吓，由導遊預先錄音嘅名勝歷史介紹，兼且仲有幾個國家語言選擇，只可惜不設普通話。雖然車費每位要成13歐元（約港幣$130），不過可以全日任坐，都抵過齋坐巴士，但切記咪唔見張車飛喎！另外，搭觀光巴士嗰陣要留意當日天氣，若當日落大雨就唔坐，安全啲，唔係有咩撞車意外發生咁恐怖，而係因為佢哋係開篷巴士，落大雨嗰陣啲雨水囤積喺樓層；就算你坐下層，部車一掟彎，上層嘅積水就好似瀑布咁洶湧而下，下層坐位又唔多，一個唔好彩你企正響下層樓梯位時，哈，呢次仲唔係「水為財」！
文、攝：TigerL