新年放假幾天，突有訪客，一位老友C自台灣來港shopping，太太到置地廣場、時代廣場掃貨，佢就行到怕怕，打電話搵左丁山到灣仔酒店飲茶。既然多年不見，左丁山有十零年未去過台灣，於是與老友C見面，互相拜年。
台灣有乜新聞呢？自不然係馬英九啦，唔少人對馬英九印象好好，但玩起政治嚟，似係玉面書生，不知人間險惡，似係宋襄公之流，點夠班街頭戰士、打慣爛仔交嘅陳水扁、蘇貞昌玩呀？
老友C乃知識分子，留學美國有高級學位，對「宋襄公」標籤，不以為然。老友C話：「其實馬英九好值得尊重，佢係台大法律系畢業，哈佛博士，好想將一啲西方民主概念，競選手法，尊重法治概念引入台灣，將中國人政治脫離古代三國，雍正權謀，毛澤東文革政治一類嘅醜惡、邪惡。好多年青人跟佢，亦因為呢一點，故此如果佢為咗求勝，而採取民進黨一類嘅奸險方式，佢會認為贏咗都冇用。當然，從現實嚟睇，馬英九陷入兩難之中，一方面要正正當當，將中國人政治選舉帶入現代西方模式，另方面就俾人在幕後設陷阱嚟困擾佢，唔知點樣甩身。」
嚡，馬英九以為與民進黨打boxing，係阿里對傅利沙，咬牙切齒，公公正正咁打十五個回合。點知一上擂台，民進黨唔係打西洋拳，而係手腳並用，泰拳、空手道、摔角招數挖眼篤鼻打踭掃腳，全部出齊，對住啲咁嘅對手，阿里都冇符啦，究竟如何是好？老友C話：「最麻煩嘅係國民黨內部總有啲老嘢如連戰、王金平等人仲係要爭權位、要搞分裂。以前還有個宋楚瑜迷戀當台灣省長時嘅得票率，發春秋大夢，專係搞搞震，呢班國民黨、親民黨嘅老派雍正年代人物一日未退出政壇，國民黨一日唔會復興！」咁講法，台灣民主是否係壞榜樣呢？老友C話：「咁又唔係，引入民主選舉後，無論點樣，台灣人已經不可能走回獨裁道路，任何人不參加選舉，就唔會有認受性，民主形式已在台灣生根，只係內容要改進而已。」