每當聽到MPV這3個字，只會令我聯想到MostPressVan，又唔係東華籌款，但居然要7個人好似玩雜技咁逼埋喺一個車廂，真係諗起都驚驚；所以小記今年一反以往祈求中六合彩金多寶的新年願望，改為希望有部舒舒服服、內櫳闊落的MPV面世來造福人群。但怎也估不到，轉個頭車版老編鬍鬚龍話畀我知：「使乜許願吖，HondaElysion咪係囉，夠豪華又夠闊落……」唉，你早的講吖，今年我無得中六合彩金多寶，都係因為你講遲2秒咋！
記者：周達之
攝影：何家亮
模特兒：Bonnie、Lo
車廂以大取勝
Elysion係Honda旗下的頂級MPV車種，以闊落豪華取勝，體積雖有番咁上下，但設計得修長而低矮，絕無半點笨重感覺！就好似一個肥佬同一個大隻佬相比，兩個體重相同，之但係你永遠唔會覺得大隻佬鈍，Elysion設計的精妙之處就在於此。
全新版本外形與上代相若，只係頭燈和鬼面罩變得更貼服，睇起上嚟更加流線，引擎方面同樣有2.4公升直4及3.0公升V6兩個型號選擇；而今次由平衡進口商引入嘅係2.4版本，但坐7個人仍然OK，配上5前速自動波，頭中尾段表現一貫平穩順滑，香港地MPV用家通常用來載一家大細，穩定安全的表現比起砰砰聲大馬力來得更實際。
提起安全，Elysion的操控的確幾順暢（以MPV嚟計，算係唔錯），再加埋原車備有主動式電子VSA及TCS，再加埋4輪碟式制動、ABS連EBD設備，喺呢個梅雨季節就更加顯得有價值。
豪華內裝夠貴氣
Elysion定位喺Odyssey之上，當年推出呢個系列係為咗追打ToyotaAlphard同NissanElgrand呢兩個走高檔路線嘅MPV車系，所以內櫳設備都係有咁講究得咁講究；一望司機位，氣派十足嘅桃木內裝，三排座椅都採用高級真皮，兼有獨立頭枕及手枕，夠晒貴氣。
Elysion最大賣點當然係夠舒適，車身大內櫳亦大，內裏空間有成2,935×1,580×1,265mm，以呢個Size裝8個人都夠鬆動，而今次介紹呢個係7人版本，所以坐起上嚟就更覺寬敞，當然用家喜歡的話亦可以揀8人版本。以往的MPV都有後排座位唔夠冷氣的通病，不過Elysion採用咗獨立送風恒溫冷氣，冷氣喺中後排直接吹出，大熱天時就唔使怕唔夠凍，又或者夾硬要勁開冷氣，搞到前排凍到震咁淒慘。至於享樂方面，CD、DVD、TV、收音機樣樣齊全；實用方面則設有倒後泊車鏡頭，新牌仔都揸得掂。
中後排變真皮床褥
多用途車最緊要夠靈活，Elysion的中後排座位可作大幅度前後移動，前中排，或者中後排座椅瞓低之後，就可以變成一張豪華真皮大床，再加上車頂有成兩個闊大天窗，中座側窗亦係超大Size，食盡自然涼風之餘，得閒駛出郊外來個日光浴都仲得。
Elysion本身係低重心設計，而佢亦擁有低腰車身，再加上左右電動趟門，令乘客上落抑或擺行李都更覺方便，就算去完Shopping攞住一袋二袋戰利品都無有怕。
HondaElysion2.4規格
引擎：2,354c.c.直4DOHC配i-VTEC
馬力：160ps/5,500rpm
扭力：22.2kgm/4,500rpm
傳動：5前速自動波，前輪驅動
懸掛：（前）雙搖臂 （後）多連桿
制動：（前）透氣碟 （後）碟式（ABS）
輪胎：215/60R17
尺碼：4,845×1,830×1,790mm
軸距：2,900mm 車重：1,820kg
售價：待定
車輛提供：富利堡汽車（28776700）
抵讚：
車櫳夠大坐得夠舒適，桃木真皮好有貴氣，駕駛感覺順暢加速亦線性，作為家庭車最正。
要彈：
沒有+/-波，少了一點駕駛樂趣；7人版本中排左右獨立座椅間的空隙，在變身「睡床」後形成凹位，瞓瞓吓覺會跌隻腳落去。
話你知：推出全為攻打Alphard和Elgrand
曾有人說，新一代Odyssey的推出，其實是Honda用來追打ToyotaAlphard和NissanElgrand的秘密武器，但原來在2004年首次登場的Elysion，才是真正的秘密武器；它憑着豪華的車廂鋪排，而令在日本的銷情暢旺，但香港市場還是由前兩者稱霸，加上代理方面亦一直未有引入，或許這是令Elysion未能在港取得成功的原因之一。