滙豐控股（005）剛公布撤換美國滙豐融資阿頭BobbyMehta，究竟對滙豐嘅股價有乜影響？網友Sweetherb喺《香港討論區》話：「滙豐大件事啦！換咗北美阿頭，今次股價想唔見130蚊都唔得啦！」
R99201都有啲擔心：「噢！咁落去，中移動（941）好難頂住個市㗎喎！」
相反，SantanHK慌死佢跌得唔夠，「滙豐個價邊有咁易跌到落130蚊呀！如果係就好喇，我會即刻叫阿媽入市。」
Raccoaddkin就好想滙豐再跌多啲，可以喺低位再入多啲貨。
唔係個個都認為滙豐換北美阿頭會影響股價，好似網友Oichu78y就認為，滙豐高層變動係好消息，覺得換個新人上任，股價有機會爆升。
Etchai2002亦唱和：「早就應該炒啦！換咗阿頭希望有助刺激股價向上。」Supermon就話：「係時候放晒啲恒生（011）入滙豐，幾年之後攞返出嚟，咪可以娶老婆囉。」
有望刺激股價
另外，網友Panda88贈咗滙豐4個字──「炒得太遲」，仲話：「做得唔掂，早就應該人頭落地啦。」
SupermonRkc778亦認為獅子銀行今次有咁嘅決定，一啲都唔出奇：「滙豐咁大企業梗係要講責任制，出咗預警之後，點都要搵人出嚟頂罪，好自然就會係北美個阿頭出來受死。」
滙豐喺上個月22日嘅股價曾高見145.4元，但受到滙豐融資嘅按揭壞賬問題拖累，貸款撥備急增至137億元，令滙控破天荒首度發出盈利警告，上周五就收報138.2元，股價至今已跌7.2元，累積跌幅約5%。
禍不單行，大行高盛更喺情人節前夕醒咗份禮物畀滙豐，將目標價調低至139元，叫人「沽售」，希望滙豐今次嘅人事變動對股價有啲幫助，挽回股東信心。