噚日8字頭嘅深圳科技公司研祥智能，搞股東特別大會講轉主板上市，華華諗住到場聽管理層講吓未來嘅鴻圖大計，順道賀吓佢哋轉板，點知管理層都未見，先受公關大員氣，一班行家白等咗成粒鐘先知管理層唔見人，食白果兼搞到一肚氣！
話說到場傳媒被安排到舉行會議室旁間房等，有記者只係開房門，公關大員即刻走嚟破口大罵，話記者想偷聽會議云云。房內記者喺嗰刻只能無言相望。
事後華華諗起覺得好笑，轉板獲通過已係意料中事，未有諗過有乜驚天大秘密可以偷聽。最令人激氣嘅係，管理層對有傳媒到場表現愕然，仲話之後有會議，冇預訪問時間，好明顯公關安排矇查查。其實記者都係想了解公司動向，如果連呢啲透明度都冇，又點叫投資者放心揼錢入你公司呢？
[email protected]