上個禮拜歐聯，巴塞隆拿睇住利物浦嘅巴拿美同埋懷斯喺魯營球場做嘅嗰場大龍鳳，紅軍就梗係笑到見牙唔見眼拍爛晒手掌，但巴隆就得個恨字，鬼叫佢地內部不和，朗拿甸奴、伊度奧，加埋教練列卡特互有心病口和心不和，搞到球隊士氣低落晒。
終於佢哋喺禮拜日嘅聯賽做番場好戲，話說喺魯營球場對住畢爾包開波唔夠半個鐘，就憑住對手嘅阿武列比達烏龍球，同埋沙維嘅入球領先，然後喺完半場前5分鐘，獲正選上陣嘅伊度奧終於取得佢自去年9月中後首個入球，協助球隊慨贈3蛋俾畢爾包，加上前列勁敵齊齊失分，令巴塞喺聯賽拉番開個領先優勢。
征紅軍勢演王子復仇記
入完波後嘅伊度奧開心到不得了，分別同「細哨」同埋列卡特互攬慶祝，見到佢哋一片歡樂，相信唔少巴塞躉都開心晒啦。我求大俠同所有波友一樣咁開心，因為如果巴塞真係上下一心嘅話，歐聯次回合作客利物浦嘅「王子復仇記」肯定更加有噱頭，話晒呢場係世紀大戰呀！