港龍航空前行政總裁許漢忠過檔機場管理局，返工一個月，噚日首次以機管局行政總裁身份主持機管局新總部啓用儀式，佢仲帶傳媒參觀新辦公室。
可能啱啱返工，佢間房冇乜放嘢，但張枱上面，好刻意咁放咗本特首曾蔭權嘅競選政綱，佢仲同大家分享，話曾蔭權推動機場與經濟發展云云。身為800人選委會委員，許總裁講明，本月底一定投票支持曾特首連任。咁梗係啦，許總裁呢份新工，都係由機管局董事會傾好，再交由曾特首最後拍板，佢又點會唔支持曾特首連任呢？
但講到底，許總裁擔任港龍行政總裁近十年，令佢喺內地有豐富人脈關係。佢都希望，可以利用呢個背景，推動機管局同內地機場合作，實行互惠互利；佢又強調，機管局唔會為咗打入內地市場，忽略香港嘅發展。
[email protected]