唔知點解特別鍾意喺街邊掃小食！魚蛋、雞蛋仔、煎釀三寶……只要聞到已經衝埋去，見到小舖企滿人個個指指點點狂叫，再加埋羊群搵食心態，真係好難把持得住！平時「掃街」硬係覺得食嚟食去嗰幾味，問大家最愛的小食，竟然輕輕數數都有成50種！而且個個都是熱門之選！
記者：朱崇德、梁學文、林佩婷、趙珮倩
攝影：陳盛臣、譚盈傑、伍慶泉
美味食店（o）
臭豆腐$6/件
好多人都知，臭豆腐要臭先好食，位於太子金魚街美味食店的臭豆腐，絕對「臭」到街知巷聞，臭到連法庭都告過幾次，罰款連改善空氣設施都整咗十幾萬。臭豆腐入口鬆化、香口、外脆內軟，難怪連阿倫、蔡瀾同唯靈等，都係佢嘅常客。一般食法都係用甜醬、辣醬「直插」，不過老闆毛太介紹，新食法會再加一抹芥辣，食落香口刺鼻好多。
生腸$5/串
生腸最重要食到有「生」嘅脆口感覺，但就要煮到全熟，外表肥肥脹脹、裏面粉粉哋，仲要以碎冰粒座住食，口感更脆。
雞腳$5/隻
紅雞腳最好味係要做到彈牙、有咬口，剛剛熟冇Over，入口非常彈牙，但筋位仍能做到骨肉分離，甜醬、芥辣侍候最一流。
碗仔翅$8/碗
肉絲、粉絲可以話係碗仔翅的靈魂，不過呢度會多落厚身冬菇，令翅味更香濃，更重要是菜脯帶來的辣味，辣得嚟又脆口，口感好有變化。
旺角火車站橋底栗子檔（p）
生炒栗子$20/磅
屬旺角40幾年最老字號！不過冇店名，人人只叫橋底生炒栗子；第二代掌門蘇太話：「𠵱家好少人生炒粟子，嫌麻煩嘛！我哋用嘅係最靚栗子，一鑊平均要炒上成個鐘！」叫了1磅已急不及待打開，粒粒剛剛熟、蜜面、軟心、香糯，吃下還猶存「生栗子」的鮮香甜美。
煨番薯$12/磅
食煨番薯，黃心甜、紫心香！呢個係基本中嘅基本，呢檔橋底番薯，好味在以大鐵爐配炭爐烤煨，當中以黃心最好賣，個個煨到標糖，熟到入心，唔係咁多地方食得到。
津味食品（q）
火辣牛丸（上）軟骨丸（下）各$8/4粒
可以話係銅鑼灣獨家嘅2款丸類，火辣牛丸加咗辣椒絲，真係好火辣辣，咬兩啖個嘴即刻變孖膶腸，額頭冒汗，勁刺激！而軟骨丸味道就一般，勝在口感特別，咬落去嗦嗦聲。
煎釀三寶$10/4件
$10/4件煎釀三寶喺銅鑼灣區算係抵食，雖然嚿青椒細咗啲，不過魚肉夠厚，算補番數啦！仲有6款任揀，可以過關食得過！
XO醬炒螺肉$10/杯
XO醬炒螺肉確實少有，睇住佢煮的時候聞到好香，真係好想食，所以即刻埋去撈一杯，香味十足，螺肉都幾爽口，味道辣辣哋，不錯！
文記傳統車仔麵茶餐廳（r）
沙嗲魚蛋$5/串
大花瓷碟、小炸爐，一睇已充滿傳統街邊魚蛋檔風味！呢度嘅沙嗲魚蛋落重料，沙嗲醬、葱頭、蒜茸、薑，真係料多過汁！更重要嘅係佢喺牛頭角下邨做足26年，日日放工時間拮魚蛋都要排隊。魚蛋都係特選，魚肉多、粉少，薑蒜味一撞，魚味特別出。
炸魷魚$5/條
一般炸魷魚都會上成寸厚粉，老闆娘文太話：「亁魷魚發開後，我哋鍾意就咁炸，魷魚味會特別出！」食用前會輕撒幼鹽，不過最正係佢個自製辣椒豉油，蒜味香之餘，辣度仲要比一般嘅勁好多，食完嗰種「孖膶腸嘴」感覺，真係唔係度度有！
輝記小食（s）
羅漢齋$6
滷水羅漢齋吸收了牛雜同魚蛋嘅精華，其實係食滷水汁。食嗰陣再加多兩滴芥辣，嘩！味道好到不得了，起碼食2串先夠喉。
Mellamo（t）
黑白配$16
熱辣辣嘅Waffle淋上朱古力加鮮忌廉，就係招牌貨黑白配，離遠已經聞到烤餅香噴噴，所以早已成為BestSeller。
芝芝狗$11
芝芝狗其實係芝士卷，外面脆皮炸到脆卜卜，裏面芝士軟腍腍。熱辣辣放入口，好易辣親口，不過唔趁熱食又食唔到芝士嘅香滑，真係對佢又愛又恨。
和風貼紫雞$13
係呢度最新推出嘅小食，日式炸雞用紫菜包住，再配以酸甜汁，$13杯有4至5嚿，味道酸酸甜甜好惹味。
新時代美食（u）
炸番薯$6/條
原條番薯搽好粉就落鑊炸到金黃色，入口甜甜哋，食落又覺得鹹鹹哋，點解咁奇怪呢？因為炸完之後阿姐落咗少少淮鹽嚟調味，所以咪又甜又鹹囉！
炸多春魚$10/5條
BBQ嗰陣就成日燒多春魚，炸嚟食反而係第一次，最正係啲多春魚條條肥嘟嘟，表面炸到好香脆，入面啲魚春夠多又夠腍滑，而且冇腥味，好好味呀！
冠環球（v）
花生糖$24/磅
完全自製花生糖，特別處係做到少甜！老闆郭生話：「落得糖多花生糖會重秤啲！所以好多人為賺錢都會做甜啲，但我就為味道，輕身賣平啲，但冇咁甜就唔會蓋過花生香味！」
免治豬肉亁$48/磅
冠環球嘅袋裝豬肉亁，超市都食唔少，但新鮮燒嘅，就只此元朗一間！新鮮燒起，肉身軟又甘甜軟熟，完全另一種口感，面層肉汁仲好Juicy。
妙舒（w）
豬肉燒賣$5/串
唓！燒賣？間間差唔多啫！錯！因為元朗妙舒係每日以鮮豬肉加厚身冬菇新鮮包製，18年歷史，可以話元朗街頭小食龍頭舖。由於使用新鮮肉，特別鮮甜，建議齋點豉油食，咁先食出原味。
泰之選泰國菜館（x）
串燒雞、牛肉、蒸糯米$20
又係泰國人街頭小食，串燒雞肉、牛肉做到微辣，惹味香口，不過最估唔到係個保鮮紙包裝的鮮糯米飯，泰國老闆娘話呢個係一個成年人的午餐份量，食落都係以飽肚為主。
薪意（y）
燒大腸$5/串
炸大腸就食得多，用嚟燒都係第一次見，外皮燒得甘香，腸內的油脂受火，只稍減油膩感，食落仲好Juicy。店主係印尼華橋，佢哋有家鄉燒汁，香辣中帶微香，十分惹味，同甘香大腸襯到絕。
景虹（z）
燒糯米$4/件
九龍城可以話係香港小泰國，所以呢度亦可搵到泰國地方小食！呢個燒糯米以蕉葉包糯米，再以香芋、蕉肉作餡，糯米表面燒得微微焦，入口香糯，餡料份外開胃；不過老實講都幾飽肚。
長河食品（z1）
糖葱餅$4/個
糖葱餅！絕對係50年代懷舊小食。最好味者當然係佢個蜂巢狀糖威化，據知元朗長河仍然係使用古方自製（唔係攞貨），新鮮做特別脆口，加椰絲、白糖夾麵粉皮，外軟內脆，充滿古典風範。
雞蛋仔$8/底
以炭火燒雞蛋仔，時下真係好難搵到，不同處係表面亁香，有少少炭火獨有的焦香；由於佢仲係用傳統雞蛋做粉漿（好多已做溝色冇蛋），所以食到入心位時，真係有如蛋黃般有腍軟的「雞蛋心」！可是由於係街邊走鬼檔，真係要睇你彩數，想搵食嘅話可以去天后一帶撞吓佢啦！
隨街搵食噏幾句
食店地址
（o）美味食店 通菜街30-32A10號舖
（p）栗子檔 旺角火車站橋底
（q）津味食品 銅鑼灣怡和街2-6號地下
（r）文記傳統車仔麵茶餐廳
牛頭角道55號利基大廈G舖
（s）輝記小食 銅鑼灣鵝頸橋附近
（t）Mellamo 銅鑼灣世貿中心附近
（u）新時代美食 銅鑼灣時代廣場附近
（v）冠環球 元朗大馬路又新街34號任安樓地下
（w）妙舒 元朗阜財街11號B舖
（x）泰之選泰國菜館 九龍城太子道西456-464號地下
（y）薪意 元朗大馬路（又新街）36號G舖
（z）景虹 九龍城城南道20號C9舖
（z1）長河食品 元朗又新街元新大廈17號地下