阿仙奴將會四大皆空！星期日輸咗聯賽盃之後，聽晚作客面對狀況甚佳嘅布力般流浪，凶多吉少！
一直以來，我都覺得布力般係一隊值得大家支持嘅球隊！自從N年前（94/95）攞過一次英超冠軍，當年係舒利亞拍瑟頓！威過之後，甘願做中游球隊，猶如運動員等退休一樣！不過，布力般前中後不乏人才，前面有朗達拍麥卡菲、羅拔斯，高Q大棍，撞到啲後衞頭暈，中間仲有摩頓柏達臣，加上主場之利兼上場贏樸茅嘅氣勢，我會支持布力般爆「廠」！
反觀阿仙奴，佢哋嘅球員名氣當然係有，一個亨利已經頂唔住，基拔圖施華握守中路，想中間劏開阿仙奴更加係難上加難！但係上一回大家都因為兼顧歐洲賽先至和波，阿仙奴仲有歐聯要玩，至於布力般，可以話係專心打足總盃，因為聯賽已經上咗岸！
至於雷丁對曼聯，主隊想爆冷，無可能，除非有「古怪」招出！曼聯已經去到唔識輸嘅程度啦，幸運之神都幫埋佢哋。
周鵬
商業1台《球迷集中贏》主持
電郵：[email protected]