昨日在美國柯達劇院舉行的奧斯卡電影頒獎典禮（AcademyAwards），各獎項已名花有主，於場外紅地氈的戰場上，眾荷李活女星爭艷的戰況也絕不遜色。本報邀請了時裝設計師鄧達智品評眾女星的服飾，他認為眾女星瀰漫着一片希臘風情。
當中妮歌潔曼憑高瘦身形，身穿入膊Balenciaga戰衣艷絕全場，設計既簡潔又奪目，達到人衣合一的境界，撼低前夫湯告魯斯的舊愛彭妮露古絲及「湯嫂」姬蒂荷姆絲。至於獲荷李活萬千寵愛的章子怡身穿黃色多層蛋糕裙，則是badtaste之選，仿如中學生首次去ball的過時打扮，有失大方。 撰文：梁錦雯
最佳衣着
妮歌 人衣合一
「妮歌潔曼（NicoleKidman）嘅骨架好高瘦，加上佢好有奧斯卡女主角嘅氣質，本身已經係一個名牌，一件簡單嘅Balenciaga入膊裙，輕易駕馭出簡潔高貴嘅氣質，好搶好sharp，是眾人之冠。」
彭妮露 華麗羽裙
「彭妮露古絲（PenelopeCruz）身穿AtelierVersace度身訂做裙，上半身好華麗，好有線條，下半身嘅羽毛部份就好似兩、三年前嘅剪裁，唔夠摩登。」
湯嫂 穩陣戰衣
「『湯嫂』姬蒂荷姆絲（KatieHolmes）演繹番佢係靚女一名，雖然冇錯位，不過相比妮歌潔曼，氣質艷光就相差好遠，所以佢需要名牌，多過名牌需要佢。」
卡塔 優雅星味
「因為卡塔布蘭切（CateBlanchett）一向都有好grand、class嘅氣質，唔需要誇張華麗嘅衣服，亦好有艷光，就係具有星嘅元素。着上了ArmaniPriv囗嘅訂做服，好配合到佢優雅嘅身份。」
姬妮芙 透視人魚
「姬妮芙柏露（GwynethPaltrow）身穿ZacPosen雪紡透視魚尾裙，好典型嘅奧斯卡華麗戰衣款式。」
珍妮花 棄籮保胸
「珍妮花洛庇絲（JenniferLopez）嘅籮霸線條一向係佢着衫着得靚嘅最大障礙，因為佢成日都要同時兼顧臀部同胸部線條美，今次佢身穿Marchesa灰紫色絲裙，棄『籮』取胸，好surprising，令人眼前一亮，絕對係好好嘅嘗試。」
