美國聯邦儲備局前主席格林斯潘離任後，棄官下海從商，成立顧問公司，以佢對美國以至全球豐富嘅財金經驗，生意的確唔使憂。
好似噚日身處華盛頓嘅佢，就透過視像會議，應邀出席本港有份參與嘅一個四地聯播研討會，回應與會商界人士一早遞交嘅問題，內容圍繞美國經濟、全球風險、中國經濟、全球暖化以至人口老化等商界人士關心嘅課題。
當中有人問格老，如果畀佢100萬美元進行一項投資，佢會點做？格老即抓緊呢個「廣告時間」，話當然投資佢自己間顧問公司啦，因為投資回報十分之好。
佢又對市場上就全球暖化對經濟造成損失嘅預測，有啲懷疑，因為唔同嘅折算方式（discountdate）會有唔同嘅結果，佢建議，如果真係導致海水上漲，係咪築起較高嘅堤壩就係最簡單合乎效益嘅方法呢？至於發達國家人口老化問題，佢話人類壽命延長同利用科技減少對人手需求，可以係解決嘅方法咁話。
[email protected]