最近來自深圳的「A貨祖兒」譚麗萍（Candy）即將到韓國整容，本身已有8成與正版祖兒相似的她，整容後更會開始接受一連串的唱歌跳舞訓練，銳意加入樂壇與天后祖兒作比較。昨日正版祖兒卻笑言Candy此舉是浪費金錢，因為她覺得自己的外貌未合標準，不知祖兒此說是謙虛還是有自知之明呢？
容祖兒、衞蘭（Janice）及方力申昨日到港台擔任「第二屆愛心獎2007」頒獎嘉賓，祖兒更大方回應有關「A貨祖兒」譚麗萍整容後加入娛樂圈一事，她說：「我覺得佢唔使嘥錢去學我囉，用咁多錢去整就唔應該揀去變做我啦，揀都揀個好啲㗎啦，我都未算係一個標準俾人去模仿，佢真係嘥咗啲錢呀。」
願大方合照
再問到祖兒會否覺得Candy借她作宣傳，她續說：「既然佢都有咗咁嘅決定啦，希望我真係會為佢帶來好運啦，不過佢真係好嘥錢。」另外有指Candy所屬的公司計劃炮製祖兒的經典服裝以打響頭炮，問到祖兒會否介意，她表示：「最緊要佢開心，總之呢行最重要係有實力。我真係冇唔開心，同事之前叫我為回應呢件事作準備，我心諗都唔知答乜好。」最後祖兒指將來有機會與「A貨祖兒」同場，絕對不介意與對方合照，她又笑言：「我知到時大家點分辨我哋啦，如果講嘢流暢嗰個就係佢，講嘢唔流暢嗰個就係我。」
減肥見成績
祖兒又透露新年時去了台灣休息及探朋友，當記者取笑她到當地探男朋友時，她即時否認並說：「唔係呀，邊度得嚟有咁多男朋友呀。」
此外，最近為了演唱會積極減肥的Janice已清減了不少，她指新年時忍口不吃賀年食品，她說：「有啲同事好衰係咁引我食蘿蔔糕、年糕，我都係食咗好少，我希望可以再瘦啲。」
採訪：李珮洳
攝影：葉君海
