呢個年頭，如果你揸緊嘅係一部柴油車，包保有好多人（甚至連政府）都會話你係造成空氣污染嘅元兇之一；但其實新一代柴油引擎技術，已經可以做到低廢氣排放，而喺3月8日開幕嘅新一屆日內瓦車展中，Volkswagen將會正式公布配用BlueMotion技術嘅Passat，其中Saloon房車版更可創出低至5.1L/100km嘅耗油紀錄。
將成為繼Polo之後，第二款注入BlueMotion技術嘅新一代Passat，除Saloon房車版外，亦會同時推出Variant旅行車版，雖然新車外觀同車廂陳設，與現時以汽油作燃料嘅版本無分別，不過引擎所造出嘅廢氣排放量及耗油量，皆創出超低嘅數值。以配用能輸出105匹馬力嘅1.9公升TDI引擎的PassatVariant為例，注入BlueMotion技術之後，所排放嘅二氧化碳含量低至137g/km之外，耗油量更可低至5.2L/100km，若以每公升$7.25嘅油價計算，平均每公里油費都只係約$0.38，比傳統柴油引擎所造出嘅每公里油費還要低。不過，港府對柴油私家車嘅規定甚嚴，呢款講究環保嘅新車到底有無機會嚟香港，就真係要睇吓班高官點諗啦！
記者：鄭達基