孖寶蛋糕焗燶爆煲單嘢，唔經唔覺過咗差唔多一年，表面睇冇乜進展，孖寶蛋糕話事人「刀球」繼續人間蒸發，佢太座「大眼」繼續情陷夜中環，見盡城中財俊，繼續做名媛，係咪代表事件不了了之？似乎又未必！
根據西環小密探講，成日話要打擊經濟犯罪嘅阿爺，呢幾年行緊殺一儆百呢套，做樣畀全世界睇，佢係幾文明進步，所以孖寶蛋糕呢單case亦唔例外，阿爺一路昅得好實，舊年7月東窗事發嗰陣，啲董事跳船嘅跳船，「刀球」即刻返祖家向阿爺交人，交代吓自己響香港做過嘅好事！
自由太太不愁寂寞
經過精密嘅案情重組，「刀球」先個月正式向阿爺交咗報告書，據聞，「刀球」話唔見咗嗰筆錢，其實係一般企業借貸，普通到唔普通，加埋個額又唔係大，呢鋪根本係英國佬銀行對佢嘅政治迫害……
劇力萬鈞、情節感人，之不過，問題係阿爺睇完都唔信，要佢再諗過個好啲嘅解釋！最好就係個答案令香港班友滿意，順便畀煲呔攞番個彩！
不過，阿爺都待佢不薄，畀佢響祖家自由行兼冇凍結佢啲錢同資產！
咁「大眼」又係咪因為老公着草而落難？聽講唔使，據聞當年結婚嗰陣，大家講明係有條件婚姻，錢呢？經已袋袋平安；人呢？以「大眼」咁嘅樣貌同埋身家，自然吃得開相識滿天下，又何愁寂寞呢！
雖然仲掛住太太個名，但「大眼」仲自由過啲靚妹仔，入黑之後，由愛心狗媽媽變身蘭桂坊女王，狂歡買醉多次俾傳媒影到，身邊男伴輪流轉，唔少個名唔太響嘅二世祖同埋專業人士都做過佢嘅伴！
[email protected]