金屬價格近日大舉回升，市場資金勢重新投入金屬相關股份，亞洲鋯業（395）近兩日成交同股價都有異動，好明顯已有春江鴨上車。
亞鋯股價上番1元水平，過去兩日成交大升到3063萬及3536萬股，唔計上月5日做「披成」嗰次（6754萬股），已係去年4月24日（4233萬股、股價1.19元）以來最勁嘅，動力咁強，一衝破去年12月中高位1.03元，短期上升目標將直指1.34元。
集團主要生產鋯化合物同鋯沙貿易，暫時係鋯相關行業的中、下游經營商，但為配合行業的迅速增長，公司已表明會走向上游，準備同原料供應商合作。去年6月底，亞鋯手上有淨現金逾1.5億元，上月再做「披成」，令手持現金上升到近2億元，相信好快就會有大動作。
亞鋯係內地甚至全球唯一生產鋯化合物的上市企業，雖冇得直接比較，但可以參考內地類近公司的表現，就發覺亞鋯真係偏低得好吸引。上海A股拜克（600226）股價由去年11月的4.50元升上近日的6.60元，升幅46.6%，預測PE係24倍；另外深圳A股韶能（000601）過去3個月更由3.20元升上5.55元，升幅更達73.4%，預測PE41倍。亞鋯去年4月見過1.19元，現時仲係大落後。
鋯化合物唔憂賣
講番鋯呢種金屬元素，由於高度耐熱抗蝕（熔點攝氏1850度），所以鋯化合物用途就好廣泛，唔憂賣，包括製造流動電話元件、壓電陶瓷、人造寶石、化妝品、光學玻璃、光纖、防火物料同核子相關物料等，最令人憧憬嘅係中央已計劃大舉發展核電，至2020年核能發電將擴大5倍，此方面需求將會為亞鋯盈利帶來新增長點。
06年（12月年結），亞鋯中期盈利微減4.1%至3260萬元，主要係稅務開支增加，實際係有增長，估計全年盈利6500萬元，每股盈利12.9仙，07年估計可上升至14仙（已計入新股攤薄），就算以類近股平均PE打個5折計，股價已可升上2.24元，翻一番。