茶記一般指茶餐廳，後來慢慢演變到茶樓、茶檔、大牌檔都可以叫茶記。唔好以為茶記只有咖啡奶茶普洱，今時今日咁嘅服務係唔夠㗎！我哋請咗3位北角地膽推介渣華道非一般茶記，學生妹Ivy力推精點茶餐廳的正宗意大利餐，貨Van霆鋒就推介有得擺酒打邊爐兼睇波的有你有我茶餐廳，經紀祖名就話鳳城酒家的懷舊菜絕對不容錯過，佢哋更不約而同話鍾意北角漁村的星洲海鮮夠特色！今時今日的茶記又點止歎茶咁簡單！
記者：林思樂
攝影：陳偉強
Model：Nick、Ivy、鋒
服裝提供：新美麗服裝公司（25975458）、北島（27782787）
特色星洲海鮮惹味夠鑊氣
渣華道街市熟食中心是茶檔大牌檔的卧虎藏龍之地，除了晚晚多人到要排隊等位的東寶小館外，北角漁村的星洲海鮮亦絕不可錯過，經紀祖名話：「呢度啲海鮮有新加坡風味，亦有自創特色小菜，水準好高！」北角漁村老闆許生曾在新加坡做過10年廚師，炮製的星洲海鮮及小炒一流。仲介紹幾款香口菜式最適合送酒，值得一提的是呢度飲啤酒唔用玻璃杯，而用冰凍不銹鋼碗，認真有心思！
新加坡辣椒蟹（時價）
許師傅用肉質結實兼啖啖肉的菲律賓蟹放湯生煮，有別於一般拉油煮法，更能帶出蟹的鮮味。再以新加坡辣椒醬、茄汁和雞蛋埋茨，醬汁辣中帶鮮甜，非常醒胃！
香芒沙律雙魚卷$58
香芒沙律雙魚卷是結合兩種鹹淡水魚肉的自創菜式，將青斑肉包住三文魚肉炸，再沾上自家製芒果沙律汁，一啖有多重滋味，魚肉炸完仍保持嫩滑多汁，芒果沙律汁酸酸甜甜好開胃！
椒鹽墨魚嘴$40
椒鹽墨魚嘴的做法同椒鹽九肚魚一樣，不過就改用少有的墨魚嘴，酥炸得非常鬆化，椒鹽鹹辣夠惹味！
北角漁村（25616184）
地址：北角渣華道99號街市熟食中心2樓6號舖
營業時間：6pm-2am
茶餐廳賣意菜價錢夠平民
學生妹Ivy話最鍾意去精點茶餐廳食西餐：「呢度除咗有一般炒粉麵飯外，仲有西餐，而且不同一般茶記的焗飯焗意粉，主打正宗意大利菜，午餐連前菜、餐湯及餐飲約$60，晚餐由$40起，但係就有酒店級水準！」皆因精點的大廚有十幾年炮製西餐經驗，曾在富豪酒店扒房和太古坊高級西餐廳做廚，負責人吳生對用料亦好講究：「我們的扒類、海鮮、意粉、沙律菜、橄欖油、淡牛油、淡忌廉等材料都用外國貨，花咗好多時間去選擇價錢大眾化又高質素的材料。」煮法亦盡量忠於西式傳統，不論用料和煮法都極具心思，難怪成日有明星捧場，連許冠英都係熟客！
法式羊扒伴意大利飯
（連餐湯及餐飲）$98
有忌廉汁和茄汁兩款選擇，怕食唔慣的可以選清新易入口的茄汁，好多客人都一試難忘。
黑橄欖醬焗銀鱈魚伴白酒煮青口
（連餐湯及餐飲）$88
先將銀鱈魚用黑橄欖和黑松露鋪面焗，再以白酒、忌廉、洋葱煮新西蘭青口，步驟繁複考心思。
焗朱古力軟心布丁$20
朱古力軟心布丁以可可純度高的朱古力炮製，味道更香濃！
精點茶餐廳（25646448）
地址：北角渣華道196-202號號4號鋪
營業時間：6:30am-11pm（西餐只於12nn-3pm及5:30pm-10:30pm供應）
酒席邊爐炒粉麵24小時全天候
貨Van霆鋒的心水茶記是24小時營業的有你有我：「呢度最正係有10幾部大電視直播足球，可以半夜打住邊爐睇波，仲連酒席都有，每逢大時大節我都會喺度Book定VIP房擺番兩圍！」貨Van霆鋒推介茶餐最正就係避風塘雞翼炒一丁，以避風塘式香蒜辣椒炒一丁夠香口，雞翼甜甜哋辣辣哋好惹味！
避風塘雞翼炒一丁
（配湯或熱飲）$40
（前）頸脊肉鮮肥牛$88（大）$68（中）$48（細）
（後）羅宋豬骨鍋$28
至於火鍋料之中最特別的就是頸脊肉鮮肥牛，即是牛頸至牛膊的肉，這部位郁動較多，肉質細緻結實，肥瘦適中，500斤重的牛之中只有15斤頸脊肉，每隻牛只有2大片，係老闆同批發商關係好才入到貨，絕對非試不可！其他火鍋料只售$7至$35，非常抵食！
有你有我（25612823）
地址：北角渣華道146-166號嘉威大廈地下6-10號舖
營業時間：24小時
點心以外半世紀懷舊菜
經紀祖名話：「鳳城酒家同一般酒樓不同之處在於最出名的不是點心，而是絕種順德菜，我最鍾意喺呢度食飯見客，嘢食好味，生意都容易啲傾得成！」鳳城酒家可稱得上是香港最老字號的順德菜酒家，已有過半百年歷史。順德菜最奧妙之處，是將最平凡的材料，配合烹調技法綜合運用，煮成珍味，講求配料、刀法。
大良炒鮮奶$68/例牌
大良炒鮮奶實在非常滑溜，自動跣入喉，兼且奶味香濃，中間夾雜鮮甜蟹肉，面頭撒上金華火腿絲和欖仁，鹹脆鮮香，送粥送飯都一流，未食過的認真要試！
炒田雞片$128/例牌（須2天前預訂）
鳳城的招牌菜是炒田雞片，關鍵在於將原隻田雞起骨，大師傅的刀章出神入化，不用一分鐘就搞掂，田雞骨更完好無缺。
鳳城酒家（25784898）
地址：北角渣華道62-68號
營業時間：9am-3pm、6pm-11pm
