喺香港呢個彈丸之地，汽車種類之多實在何其壯觀，無論任何款式嘅新車抑或係名貴跑車，都可以喺呢度搵到；咁樣除咗證明港人嘅富貴，也代表咗愛車之人特別多，部份公子哥兒為求滿足慾望，莫說過百萬嘅名貴車輛，甚至超過3、4百萬嘅都只算皮毛之癢，何足掛齒。相對一啲平民百姓，只有目定口呆，而部份能力有限嘅愛車人士，亦為求有耀武揚威嘅本事，繼而選擇絕版車種，嚟盡顯其有Taste嘅一面。當然，要打理一輛古董車所花費嘅時間同心血，係金錢無可能買得到嘅；正所謂貴有貴買，平有平買，除咗一啲稀世珍品外，仲有一啲只要數萬元就能買到嘅舊款絕版車，VolkswagenBeetle（甲蟲車）正是一個好例子。
一部曾風靡全球嘅平民車，論外貌真係絕無僅有，一啲甲蟲車車主亦不惜工本令愛驅與別不同，尋求眾人嘅羨慕目光；但原來喺意大利佛羅倫斯，佢哋嘅命運就完全不同。就圖片所見，這部棄在路旁嘅甲蟲車，勢估唔到除咗一身灰塵和傷痕纍纍外，4條輪胎好似枯亁咗嘅鮮花咁，好似要話畀人聽：「我老啦，無幾耐命㗎啦！」一代梟雄竟落得如此下場，真係聞者傷心，聽者流淚。
文、攝影：TigerL