口碑比《戰火旗蹟》（FlagsofOurFathers）更好嘅《硫磺島戰書》（LettersFromIwoJima），係美國導演奇連伊士活（ClintEastwood）從日本人角度去睇二次大戰，影片除咗眾星如雲，有渡邊謙、中村獅童以及尊尼偶像二宮和也演出外，最重要係導演送畀大家一個前所未有咁感人又有意義嘅戰爭片。 撰文：戶川淳
奇連伊士活雖然已經76歲，不過佢近年拍嘅電影越嚟越有heart，唔再做銀幕上嘅神槍手辣幹探之後，反而透過電影去探討好多關於生命嘅題材。早前上映嘅《戰火旗蹟》，講述六個美軍被拍下喺硫磺島戰役中插上美國國旗嘅歷史一刻，其中三個有幸執番命仔回國嘅軍人，被捧成英雄嘅矛盾內疚感受。
有血有肉個性突出
本周四（3月1日）喺本地正式上映嘅日語片《硫磺島戰書》，就反過來從日軍嘅角度出發去睇同一場戰役，不過，大家唔好即時帶定有色眼鏡去睇，奇連要講嘅係一班明知死路一條，仍要踏上戰場嘅無辜平民心態。
《硫磺島》台前卡士一啲都唔弱，而每一個角色都唔係陳腐嘅典型，憑《最後武士》（TheLastSamurai）躍升國際演員、又提名過金球獎男配角嘅渡邊謙，扮演嘅陸軍中將唔止係實事求是，唔擺款又唔濫權，仲喺任何時間都係身先士卒，總會為啲手足着想，簡直係絕世好上司！
人性描畫細緻深刻
至於離婚鬧劇沒完沒了嘅《霍元甲》男星中村獅童雖然出場唔多，片中嘅佢又口口聲聲係為天皇而戰嘅海軍大尉，殺氣騰騰，但面對死嗰陣表現得好懦弱，好諷刺！片中另一位日星伊原剛志扮演嘅陸軍中佐，原本係奧運選手，佢同一名美軍戰俘講返跟美國人喺運動場上建立嘅友情亦相當感人。
最令人意外係外表一向好細路嘅尊尼仔組合「嵐」成員二宮和也，佢喺片中嘅表現令人眼前一亮，片中嘅二宮本來係麵包師傅，連妻子腹中塊肉都未見過就被徵召上戰場，佢因為想見吓妻兒，促使自己喺戰火中有極強嘅求生意志，仲懶理被其他人批評係懦夫，都堅拒用手榴彈自殺，今次演出同佢一貫做開嘅𡃁仔角色完全唔同。